បាល់ទាត់៖ ការប្រកួតបាល់ទាត់ដណ្ដើមពានរង្វាន់ឯកឧត្តម គង់ សោភ័ណ្ឌ អភិបាលនៃគណៈអភិបាលខេត្តកណ្ដាល បានបញ្ចប់ការប្រកួតវគ្គ ៨ក្រុមចុងក្រោយ និងរកឃើញបេក្ខភាពវគ្គពាក់កណ្ដាលផ្ដាច់ព្រ័ត្រហើយ រួមមានក្រុម TN Kandal, ក្រុមយុវជនស្រុកខ្សាច់កណ្ដាល, ក្រុមយុវជនស្រុកល្វាឯម និក្រុមយុវជនស្រុកមុខកំពូល។
ឆ្លងកាត់ការប្រកួតវគ្គ ៨ក្រុមចុងក្រោយរយៈពេល ២ថ្ងៃកាលពីសប្ដាហ៍កន្លងទៅនៅកីឡដ្ឋានខេត្តកណ្ដាល ចំពោះក្រុម TN Kandal បានយកឈ្នះក្រុមមន្ទីរអប់រំ យុវជន និងកីឡាខេត្តកណ្ដាលទាំងលំបាកក្នុងលទ្ធផល ១-០ ដែលធ្វើសម្រេចដោយកីឡាករ ពៅ វិច្ឆិកា នៅនាទី៩០+៥។ ឯក្រុមយុវជនស្រុកខ្សាច់កណ្ដាលបានយកឈ្នះយុវជនស្រុកកៀនស្វាយ ៣-១។ ការប្រកួតនេះវគ្គទី១ ក្រុមទាំងពីរបានបញ្ចប់ក្នុងលទ្ធផលស្មើគ្នា ១-១ តែវគ្គទី២ កីឡាករ អ៊ឹម សុផានិត្យ និង គង់ និមល បានបន្ថែមម្នាក់ ១គ្រាប់ឲ្យក្រុមយុវជនស្រុកសាច់កណ្ដាល ដែលជួយឲ្យក្រុមធានាកៅអីវគ្គពាក់កណ្ដាលផ្ដាច់ព្រ័ត្រតែម្ដង។
ចំណែកក្រុមយុវជនស្រុកល្វាឯម បានទម្លាក់ក្រុមស្វាយរលំអេហ្វស៊ីដោយលទ្ធផល ៥-០។ ៥គ្រាប់របស់ក្រុមតំណាងស្រុកល្វាឯមនេះធ្វើសម្រេចដោយកីឡាករ សុខ គន់គី នៅនាទី២៣ ខណៈ ៤គ្រាប់ទៀតរកបានដោយកីឡាករ សួន ថាវី និង សាត់ សំណាង ម្នាក់ ២គ្រាប់។ ដោយឡែកក្រុមយុវជនស្រុកមុខកំពូល ទម្លាក់ក្រុមម្ចាស់ផ្ទះក្រុងតាមខ្មៅ ដោយការទាត់បាល់ប៉េណាល់ទីកាត់សេចក្ដី ៤-២ បន្ទាប់ពីប្រកួត ៩០នាទីស្មើគ្នា ០-០។ សម្រាប់កម្មវិធីប្រកួតវគ្គពាក់កណ្ដាលផ្ដាច់ព្រ័ត្រ នៃពានរង្វាន់អភិបាលខេត្តកណ្ដាលឆ្នាំ២០២២ នេះគ្រោងនឹងធ្វើឡើងនាថ្ងៃទី១១ ខែមីនាចុងសប្ដាហ៍នេះដោយក្រុម TN Kandal ត្រូវជួបក្រុមយុវជនស្រុកខ្សាច់កណ្ដាល និងក្រុមយុវជនស្រុកល្វាឯមជួបក្រុមយុវជនស្រុកមុខកំពូល ដើម្បីប្រជែងកៅអីវគ្គផ្ដាច់ព្រ័ត្រ៕ អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
