សារព័ត៌មាន Al Jazeera របស់កាតា បានរាយការណ៍កាលពីថ្ងៃចន្ទ (៥ មករា) ថា យោធាអ៊ីស្រាអែល បានចំណាយពេល ២៤ម៉ោងកន្លងទៅនោះ ដើម្បីពង្រីក «បន្ទាត់ពណ៌លឿង» ដែលកំណត់ឱ្យកងកម្លាំងអ៊ីស្រាអែល ឈរជើងក្នុងបទឈប់បាញ់ខែតុលា នៅភាគខាងកើតតំបន់ហ្កាហ្សា ជាពិសេសក្នុងសង្កាត់ Tuffah សង្កាត់ Shujayea និង Zeitoun ភាគខាងកើតទីក្រុងហ្កាហ្សា ដោយរុញច្រានជនជាតិប៉ាឡេស្ទីនឱ្យចូលក្នុងផ្នែកដ៏តូចចង្អៀត។

សកម្មភាពរបស់កងទ័ពអ៊ីស្រាអែល កាលពីថ្ងៃចន្ទ ក៏កំពុងរុញទៅជិតផ្លូវ Salah al-Din ដ៏សំខាន់ផងដែរ ដោយបង្ខំឱ្យជនភៀសខ្លួនដែលជ្រកកោនជិតតំបន់នោះ រត់គេចដើម្បីសុវត្ថិភាព ខណៈក្រុមគ្រួសារជាច្រើនក្នុងចំណោមនោះ ស្ថិតនៅក្រោមការគំរាមកំហែងយ៉ាងខ្លាំង ស្របពេលវិបត្តិនៅតំបន់ហ្កាហ្សា មិនបង្ហាញសញ្ញានៃការថមថយឡើយ។

សេចក្ដីរាយការណ៍បន្តថា ឥឡូវនេះ អ៊ីស្រាអែលកាន់កាប់ផ្ទៃដីជាង ៥០% នៃតំបន់ហ្កាហ្សា។ ចាប់តាំងពីបទឈប់បាញ់ចូលជាធរមានកាលពីឆ្នាំមុនមក ការវាយប្រហាររបស់អ៊ីស្រាអែល បានសម្លាប់ជនជាតិប៉ាឡេស្ទីនជាង ៤០០នាក់ និងរបួសជាង ១ពាន់នាក់ ក្នុងការរំលោភបទឈប់បាញ់ស្ទើរតែរាល់ថ្ងៃ ទោះបីជាមានកិច្ចព្រមព្រៀងដែលសម្របសម្រួលដោយសហរដ្ឋអាមេរិក នៅថ្ងៃទី១០ ខែតុលា ឆ្នាំ២០២៥ ក៏ដោយ។

អ្នកកាសែត Al Jazeera បាននិយាយថា សកម្មភាពរបស់អ៊ីស្រាអែលដែលកំពុងបន្តនៅហ្កាហ្សា និងការពង្រីក «បន្ទាត់លឿង» នោះ មានន័យថានឹងលេបត្របាក់ទឹកដីកាន់តែច្រើនទូទាំងផ្នែកភាគខាងកើត ដោយធ្វើឱ្យផ្ទៃដីសរុបដែលអ្នកស្រុកប៉ាឡេស្ទីនកំពុងជ្រកកោន កាន់តែរួមតូច៕