សមាគមសារព័ត៌មានជាតិរបស់វ៉េណេស៊ុយអេឡា បាននិយាយថា បុគ្គលិកប្រព័ន្ធផ្សព្វផ្សាយជាង ១០នាក់ ត្រូវបានឃុំខ្លួនកាលពីថ្ងៃចន្ទ (៥ មករា) ខណៈពេលកំពុងយកព័ត៌មានអំពីព្រឹត្តិការណ៍នានាក្នុងរដ្ឋធានីការ៉ាកាស រួមទាំងការដង្ហែក្បួនគាំទ្រប្រធានាធិបតីដែលត្រូវបានបណ្តេញចេញពីតំណែង លោក Nicolas Maduro និងការស្បថចូលកាន់តំណែងរបស់សភាថ្មីនៃប្រទេសអាមេរិកខាងត្បូងមួយនេះ។

ក្រោយមក សមាគមសារព័ត៌មាន (SNTP) បាននិយាយលើបណ្ដាញសង្គម X ថា អ្នកដែលត្រូវបានឃុំខ្លួនទាំង ១៤នាក់នោះ ត្រូវបានដោះលែងវិញហើយ ប៉ុន្តែបុគ្គលម្នាក់ជាអ្នកកាសែតបរទេស ត្រូវបាននិរទេសខ្លួន។ SNTP បន្តថា អ្នកដែលត្រូវបានឃុំខ្លួនរួមមាន មនុស្ស ១១នាក់ ដែលធ្វើការជាមួយប្រព័ន្ធផ្សព្វផ្សាយអន្តរជាតិ និងម្នាក់ទៀតធ្វើការជាមួយប្រព័ន្ធផ្សព្វផ្សាយជាតិ។

ការឃុំខ្លួនអ្នកកាសែតទាំងនេះ កើតឡើងបន្ទាប់ពីយោធាអាមេរិក បានចាប់ខ្លួនលោក Maduro នៅក្នុងប្រតិបត្តិការដ៏រហ័សមួយកាលពីនៅថ្ងៃសៅរ៍ ចុងសប្តាហ៍កន្លងទៅ។ កាលពីថ្ងៃចន្ទ មេដឹកនាំដែលត្រូវបានបណ្តេញចេញពីតំណែងរូបនេះ បានផ្ដល់ចម្លើយពីភាពគ្មានទោសចំពោះបទចោទប្រកាន់ជាច្រើនករណី នៅក្នុងតុលាការទីក្រុងញូវយ៉ក។ ចាប់តាំងពីពេលនោះមក អនុប្រធានាធិបតីវ៉េណេស៊ុយអេឡា គឺលោកស្រី Delcy Rodriguez បានឡើងកាន់តំណែងជាមេដឹកនាំបណ្ដោះអាសន្ន៕