សារព័ត៌មាន Politico បានរាយការណ៍ថា រដ្ឋបាលរបស់ប្រធានាធិបតីសហរដ្ឋអាមេរិក លោក ដូណាល់ ត្រាំ បានទាមទារឲ្យប្រធានាធិបតីស្តីទីរបស់ប្រទេសវ៉េណេស៊ុយអេឡា គឺលោកស្រី Delcy Rodriguez បញ្ឈប់ការផ្គត់ផ្គង់ប្រេងទៅឲ្យប្រទេសដែលសហរដ្ឋអាមេរិកចាត់ទុកថា ជាសត្រូវរបស់ខ្លួន។  

យោងតាម Politico បានឲ្យដឹងថា «មន្ត្រីសហរដ្ឋអាមេរិកបានប្រាប់លោកស្រី Delcy Rodriguez ថា ពួកគេចង់ឃើញយ៉ាងហោចណាស់វិធានការបីពីលោកស្រី៖ បង្ក្រាបលំហូរគ្រឿងញៀន; បណ្តេញជនជាតិអ៊ីរ៉ង់ គុយបា និងភ្នាក់ងារផ្សេងទៀតនៃប្រទេសនានា ឬបណ្តាញដែលមានអរិភាពចំពោះទីក្រុងវ៉ាស៊ីនតោន និងបញ្ឈប់ការលក់ប្រេងទៅឲ្យសត្រូវរបស់សហរដ្ឋអាមេរិក។ នេះបើយោងតាមមន្ត្រីសហរដ្ឋអាមេរិកម្នាក់ដែលដឹងពីស្ថានភាព និងមនុស្សម្នាក់ដែលដឹងអំពីការពិភាក្សាផ្ទៃក្នុងរបស់រដ្ឋបាលនេះ»។

មន្ត្រីពីរនាក់និយាយថា របាយការណ៍នេះ បានបន្ថែមថា ភាគីសហរដ្ឋអាមេរិក ក៏រំពឹងថា លោកស្រី Rodriguez «នៅទីបំផុតនឹងសម្របសម្រួលការបោះឆ្នោតដោយសេរី និងលាលែងពីតំណែង»។ ប៉ុន្តែ     ថ្ងៃផុតកំណត់សម្រាប់ការទាមទារនេះ គឺមិនទៀងទាត់ទេ ហើយមន្ត្រីអាមេរិកបានសង្កត់ធ្ងន់ថា មិនមានការបោះឆ្នោតណាមួយ ដែលជិតមកដល់នោះទេ។

កាលពីថ្ងៃទី ០៣ ខែមករា លោក ត្រាំ បាននិយាយថា ការផ្គត់ផ្គង់ប្រេងពីប្រទេសវ៉េណេស៊ុយអេឡាទៅកាន់ប្រទេសចិន នឹងបន្ត។ លោកក៏បានសង្កត់ធ្ងន់ផងដែរថា សហរដ្ឋអាមេរិកមានបំណងលក់ប្រេងរបស់វ៉េណេស៊ុយអេឡាទៅឲ្យប្រទេសដទៃទៀត និងបង្កើនបរិមាណនៃការផ្គត់ផ្គង់បែបនេះ៕