បន្ទាប់ពីបានចូលរួមសន្និសីទរបស់មន្ត្រីជាន់ខ្ពស់ ស្ដីអំពីគោលនយោបាយរបស់រដ្ឋបាល ចំពោះប្រទេសវ៉េណេស៊ុយអេឡា សមាជិកសភាមកពីគណបក្សសាធារណរដ្ឋ កាលពីថ្ងៃចន្ទ (ទី៥ ខែមករា ឆ្នាំ២០២៦) បានប្រាប់ឲ្យដឹងថា ប្រធានាធិបតីអាមេរិក លោក Donald Trump មិនមានគម្រោងកាន់កាប់ ឬកសាងប្រទេស នៅប្រជាជាតិអាមេរិកខាងត្បូងមួយនេះទេ។

បន្ទាប់ពីមានមានកិច្ចប្រជុំសម្ងាត់ជាមួយរដ្ឋមន្ត្រីការបរទេស លោក Marco Rubio រដ្ឋមន្ត្រីការពារជាតិ លោក Pete Hegseth និងមន្ត្រីជាន់ខ្ពស់ផ្សេងទៀត ប្រធានសភាតំណាងរាស្រ្ត លោក Mike Johnson នៃរដ្ឋ Louisiana បានប្រាប់អ្នកសារព័ត៌មានថា៖ «យើងមិនមានកងកម្លាំងប្រដាប់អាវុធអាមេរិក នៅក្នុងប្រទេសវេណេស៊ុយអេឡាទេ ហើយយើងមិនកាន់កាប់ប្រទេសនេះនោះទេ»។

តំណាងរាស្ត្រ លោក Brian Mast ដែលជាប្រធានគណៈកម្មាធិការកិច្ចការបរទេសនៃសភារបស់បក្សសាធារណរដ្ឋ បាននិយាយថា៖ «ប្រសិនបើនរណាម្នាក់ចង់ប្រើពាក្យថា ការកសាងប្រទេស ឬអ្វីដូចនេះ វាហាក់ដូចជាមិនមាននរណាម្នាក់ បានឃើញនៅក្រោមការដឹកនាំរបស់លោកប្រធានាធិបតី Trump នោះឡើយ»។

នៅពេលត្រូវបានសួរថា តើលោកនឹងធានាអះអាងដល់ប្រជាជនអាមេរិកថា ប្រទេសនោះនឹងមិនប្រឈមជាមួយ «សង្គ្រាមគ្មានទីបញ្ចប់» ផ្សេងទៀត ដូចជម្លោះរយៈពេល ២០ឆ្នាំ នៅអាហ្វហ្គានីស្ថានដែរ ឬទេ លោក Mast បានប្រាប់អ្នកសារព័ត៌មានបន្ទាប់ពីមានកិច្ចប្រជុំរយៈពេលជាង ២ម៉ោងកន្លះនោះថា «រដ្ឋបាលមិនមានបំណងឲ្យមានសង្រ្គាមអូសបន្លាយពេលឡើយ»។

គួរបញ្ជាក់ថា លោក Trump បានបញ្ជូនទាហានអាមេរិកទៅកាន់ទីក្រុងការ៉ាកាស កាលពីព្រឹកព្រលឹមថ្ងៃទី៣ ខែមករា ដើម្បីចាប់ខ្លួនប្រធានាធិបតីវ៉េណេស៊ុយអេឡា លោក Nicolas Maduro ដែលបានផ្ដល់ចម្លើយពីភាពគ្មានទោស នៅថ្ងៃទី៥ ខែមករា ជុំវិញបទចោទគ្រឿងញៀន៕