សាក្សីបានប្រាប់ឲ្យដឹងថា ស្នូរគ្រាប់កាំភ្លើងត្រូវបានបន្លឺឡើង កាលពីល្ងាចថ្ងៃចន្ទ (ទី៥ ខែមករា ឆ្នាំ២០២៦) នៅជិតវិមានប្រធានាធិបតីនៃប្រទេសវ៉េណេស៊ុយអេឡា ប៉ុន្មានថ្ងៃបន្ទាប់ពីកងកម្លាំងសហរដ្ឋអាមេរិកបានចាប់ខ្លួនប្រធានាធិបតី លោក Nicolas Maduro នៅក្នុងការវាយឆ្មក់មួយដោយយោធា។

តែយ៉ាងណាក្ដី ប្រភពស្និទ្ធនឹងរដ្ឋាភិបាល បានបញ្ជាក់ថា ស្ថានការណ៍ស្ថិតក្រោមការគ្រប់គ្រង។ ប្រភពដដែលនេះ បាននិយាយថា យានដ្រូនមិនស្គាល់អត្តសញ្ញាណ បានហោះពីលើវិមាន Miraflores នៅកណ្តាលទីក្រុងការ៉ាកាស ហើយកងកម្លាំងសន្តិសុខ បានបើកការបាញ់តបវិញ នៅម៉ោងប្រហែល ៨យប់ម៉ោង (ម៉ោងក្នុងស្រុក) ប៉ុន្មានម៉ោងបន្ទាប់ពីអនុប្រធានាធិបតីរបស់លោក Maduro គឺលោកស្រី Delcy Rodriguez បានស្បថចូលកាន់តំណែងជាប្រធានាធិបតីបណ្ដោះអាសន្ន បន្ទាប់ពីរូបលោកត្រូវបានទម្លាក់ពីតំណែង។

ការផ្ទុះអាវុធនេះ បានកើតឡើង ប៉ុន្តែមិនខ្លាំងដូចការវាយប្រហារ នាព្រឹកព្រលឹមថ្ងៃទី៣ ខែមករានោះឡើយ ជាពេលដែលបានលោក Maduro ត្រូវបានផ្ដួលរំលំ។ នេះបើយោងតាមមនុស្សម្នាក់រស់នៅចម្ងាយ ៥ប្លុកពីវិមានប្រធានាធិបតីដែលបាននិយាយថា ឧប្បត្តិហេតុនោះមានរយៈពេលប្រហែល ១នាទី។

ក្រសួងទំនាក់ទំនងមិនបានឆ្លើយតបភ្លាមៗនោះឡើយ ចំពោះសំណើសុំការអត្ថាធិប្បាយរបស់សារព័ត៌មាន។ វីដេអូដែលបានបង្ហោះលើបណ្តាញសង្គម បង្ហាញពីអ្វីដែលទំនងជាគ្រាប់កាំភ្លើងបាញ់ឡើងទៅលើមេឃ។ ហើយវីដេអូនោះ ក៏បានបង្ហាញឲ្យឃើញផងដែរពីសមាជិកកម្លាំងសន្តិសុខជាច្រើននាក់ប្រញាប់ប្រញាល់ទៅកាន់វិមាននោះ បន្ទាប់ពីមានការបាញ់ប្រហារ៕