ប្រធានាធិបតីនៃប្រទេសអារ៉ាប់រួម (UAE) លោក Sheikh Mohamed bin Zayed Al Nahyan បានធ្វើការសន្ទនាតាមទូរស័ព្ទកាលពីថ្ងៃចន្ទ ជាមួយប្រធានាធិបតីទួរគី លោក រ៉េសិប តាយីប អឺដូហ្កាន់ (Recep Tayyip Erdogan) ដើម្បីពិភាក្សាអំពីបញ្ហាក្នុងតំបន់ និងអន្តរជាតិ ដោយផ្តោតលើស្ថានភាពនៅតំបន់ហ្កា ហ្សា។ នេះបើយោងតាមទីភ្នាក់ងារសារព័ត៌មានរដ្ឋអារ៉ាប់រួម WAM។

មេដឹកនាំទាំងពីរបានពិភាក្សាអំពីវិបត្តិមនុស្សធម៌ នៅតំបន់ហ្កាហ្សា ដោយសង្កត់ធ្ងន់លើតម្រូវការក្នុងការគាំទ្រឈប់បាញ់ ធានាការផ្តល់ជំនួយមនុស្សធម៌គ្រប់គ្រាន់ដោយមិនមានការរំខាន និងបន្ធូរបន្ថយទុក្ខវេទនារបស់ជនស៊ីវិល។

ពួកគេបានបញ្ជាក់ជាថ្មីអំពីតម្រូវការក្នុងការពង្រឹងកិច្ចខិតខំប្រឹងប្រែងឆ្ពោះទៅរកសន្តិភាពដ៏យុត្តិធម៌ និងយូរអង្វែង ដោយផ្អែកលើដំណោះស្រាយរដ្ឋពីរ ដែលពួកគេបាននិយាយថា ជាផ្លូវតែមួយគត់ដែលអាចសម្រេចបាននូវស្ថិរភាពក្នុងតំបន់រយៈពេលវែង សន្តិសុខ និងអនាគតកាន់តែប្រសើរសម្រាប់ប្រជាជន។

មេដឹកនាំទាំងពីរក៏បានពិនិត្យឡើងវិញនូវទំនាក់ទំនងទ្វេភាគី ស្វែងយល់ពីវិធី ដើម្បីពង្រីកកិច្ចសហប្រតិបត្តិការលើវិស័យសំខាន់ៗ និងផ្លាស់ប្តូរទស្សនៈអំពីបញ្ហាផ្សេងទៀតនៃការព្រួយបារម្ភទៅវិញទៅមក។ នេះបើយោងតាមរបាយការណ៍របស់សារព័ត៌មាន WAM៕