មានអ្នកស្លាប់យ៉ាងហោចណាស់ ២៥នាក់ នៅក្នុងប្រទេសអ៊ីរ៉ង់ អំឡុងរយៈពេល ៩ថ្ងៃដំបូងនៃការតវ៉ាដែលបានចាប់ផ្តើមកើតចេញពីផ្សារនៃទីក្រុងតេអេរ៉ង់ ដោយសារតម្លៃរូបិយប័ណ្ណធា្លក់ចុះ និងអតិផរណាកើនឡើង។ នេះបើយោងតាមការឲ្យដឹងពីក្រុមសិទ្ធិមនុស្ស។

ការតវ៉ាបានរីករាលដាលដល់ទីក្រុងមួយចំនួន នៅភាគខាងលិច និងភាគខាងត្បូងរបស់អ៊ីរ៉ង់ ប៉ុន្តែមិនធំដូចនឹងទំហំនៃភាពចលាចលដែលបានកើតមានក្នុងប្រទេសនេះ ក្នុងឆ្នាំ ២០២២-២០២៣ ពាក់ព័ន្ធនឹងមរណភាពរបស់នាង Mahsa Amini ដែលស្លាប់អំឡុងពេលស្ថិតក្រោមការឃុំឃាំងរបស់នគរបាលសីលធម៌អ៊ីរ៉ង់ ជុំវិញការចោទប្រកាន់ថា បានរំលោភលើច្បាប់ស្លៀកសំលៀកបំពាក់ដ៏តឹងរឹងរបស់សាធារណរដ្ឋឥស្លាម។

តែទោះបីជាមានទំហំតូចជាងក៏ដោយ ក៏ការតវ៉ាទាំងនេះបានរីករាលយ៉ាងឆាប់រហ័ស ពីការផ្តោតលើតែផ្នែកសេដ្ឋកិច្ច ទៅជាការខកចិត្តកាន់តែទូលំទូលាយ ដោយអ្នកតវ៉ាខ្លះថែមទាំងបានស្រែកប្រឆាំងនឹងមេដឹកនាំផ្ដល់ឱវាទខាងសាសនារបស់ប្រទេសទៀតផង។

អ៊ីរ៉ង់ក៏នៅតែស្ថិតក្រោមសម្ពាធអន្តរជាតិផងដែរ ដោយប្រធានាធិបតីអាមេរិក លោក Donald Trump បានគំរាមកាលពីថ្ងៃសុក្រសប្ដាហ៍កន្លងមកថា នឹងមកជួយបាតុករក្នុងប្រទេសអ៊ីរ៉ង់នេះ ប្រសិនបើកងកម្លាំងសន្តិសុខ បានបាញ់ប្រហារពួកគេ។ ជាការឆ្លើយតប មេដឹកនាំកំពូលរបស់អ៊ីរ៉ង់ លោក Ayatollah Ali Khamenei បានសច្ចាថា នឹងមិន «ចុះញ៉មជាមួយសត្រូវឡើយ»។

Hengaw ដែលជាក្រុមសិទ្ធិមនុស្សជនជាតិឃឺដអ៊ីរ៉ង់ បានដាក់ចំនួនអ្នកស្លាប់ ២៥នាក់ ក្នុងនោះរួមមានទាំង ៤នាក់ដែលមានអាយុក្រោម ១៨ឆ្នាំផងដែរ។ ស្ថាប័ននេះបានបន្ថែមថា មនុស្សជាង ១.០០០នាក់ ត្រូវបានចាប់ខ្លួន។ តែ HRANA ដែលជាបណ្តាញសកម្មជនសិទ្ធិមនុស្ស បានឲ្យដឹងថា មនុស្ស ២៩នាក់យ៉ាងតិច បានបាត់បង់ជីវិត ក្នុងនោះរួមទាំងមានភ្នាក់ងារអនុវត្តច្បាប់ ២នាក់ផងដែរ បន្ថែមពីលើការចាប់ខ្លួន ១.២០៣នាក់ គិតត្រឹមថ្ងៃទី៥ ខែមករា ឆ្នាំ២០២៦៕