ការិយាល័យឧត្តមស្នងការសិទ្ធិមនុស្សអង្គការសហប្រជាជាតិ(OHCHR)និយាយនៅថ្ងៃអង្គារនេះថា សហគមន៍ពិភពលោកត្រូវតែច្បាស់លាស់ថា ការអន្តរាគមន៍របស់សហរដ្ឋអាមេរិកនៅប្រទេសវេណេស៊ុយអេឡា គឺបំពានច្បាប់អន្តរជាតិដែលធ្វើឲ្យពិភពលោកលែងសូវមានសុវត្ថិភាពទៀតហើយ ។

កងកម្លាំងសហរដ្ឋអាមេរិកបានទម្លាក់អំណាចមេដឹកនាំវេណេស៊ុយអេឡាលោក Nicolas Maduro នៅក្នុងប្រតិបត្តិការដ៏គួរឲ្យភ្ញាក់ផ្អើលមួយកាលពីចុងសប្តាហ៍កន្លងទៅ ។ លោកប្រឈមនឹងការចោទប្រកាន់ឧក្រិដ្ឋកម្ម ៤ករណីនៅតុលាការសហព័ន្ធអាមេរិក រួមទាំងភេរវកម្មគ្រឿងញៀន ហើយអនុប្រធានាធិបតីរបស់លោក Maduro បានស្បថចូលកាន់តំណែងជាប្រធានាធិបតីស្តីទី ។

អ្នកស្រី Ravina Shamdasani គឺជាអ្នកនំាពាក្យការិយាល័យ OHCHR និយាយប្រាប់ក្រុមអ្នកសារព័ត៌មានថា ដោយមិនមែនជាជ័យជម្នះសម្រាប់សិទ្ធិមនុស្ស ការអន្តរាគមន៍ផ្នែកយោធារបស់ពួកគេ ដែលជាការរំលោភលើអធិបតេយ្យភាពរបស់វេណេស៊ុយអេឡា និងធម្មនុញ្ញអង្គការសហប្រជាជាតិ ធ្វើឲ្យប៉ះពាល់ដល់រចនាសម្ព័ន្ធសន្តិសុខអន្តរជាតិ វានឹងធ្វើឲ្យរាល់ប្រទេសលែងសូវមានសុវត្ថិភាពទៀតហើយ ។

អ្នកស្រីបន្តថា គ្មានការបំភាន់ ឬការបង្វែរចំណាប់អារម្មណ៍ណាមួយ អាចផ្លាស់ប្តូរការពិតទាំងនេះបានឡើយ ។ អនាគតរបស់វេណេស៊ុយអេឡា ត្រូវតែកំណត់ឡើងដោយពលរដ្ឋរបស់ពួកគេមួយគត់ ហើយអស្ថិរភាព និងយោធាភាវូបនីយកម្មបន្ថែមទៀត មានតែធ្វើឲ្យស្ថានភាពមនុស្សធម៌នៅទីនោះ កាន់តែអាក្រក់ទៅប៉ុណ្ណោះ ៕