ក្រសួងការបរទេសចិននិយាយនៅថ្ងៃអង្គារនេះថា ខ្លួនគាំទ្រយ៉ាងមុតមាំរដ្ឋាភិបាល និងពលរដ្ឋវេណេស៊ុយអេឡា ក្នុងការការពារអធិបតេ្យភាព សន្តិសុខ សិទ្ធិស្របច្បាប់ និងអត្ថប្រយោជន៍របស់ពួកគេ ។

អ្នកនាំពាក្យក្រសួងការបរទេសចិនអ្នកស្រី Mao Ning និយាយនៅក្នុងសន្និសីទសារព័ត៌មានថា ចិនត្រៀមខ្លួនរួចរាល់ក្នុងការធ្វើការជាមួយបណ្តាប្រទេសជាច្រើននៅក្នុងតំបន់ និងនៅក្នុងសហគមន៍អន្តរជាតិ ដើម្បីរួមគ្នារក្សាសន្តិភាព និងស្ថិរភាពនៅអាមេរិកឡាទីន និងតំបន់ការ៉ាអ៊ីប ។

កាលពីថ្ងៃចន្ទម្សិលមិញ អគ្គលេខាធិការអង្គការសហប្រជាជាតិ(UN) លោក Antonio Guterres បានអំពាវនាវឲ្យមានការគោរពឯករាជ្យភាពនយោបាយរបស់ប្រទេស បន្ទាប់ពីប្រតិបត្តិការយោធារបស់សហរដ្ឋអាមេរិកនៅក្នុងប្រទេសវ៉េណេស៊ុយអេឡា ដែលទីក្រុងវ៉ាស៊ីនតោនបានការពារថា ជាសកម្មភាពរបស់នគរបាលប្រឆាំងនឹងមេដឹកនាំខុសច្បាប់របស់ទីក្រុង Caracas។

កងកម្លាំងសហរដ្ឋអាមេរិក បានចាប់ខ្លួនលោកប្រធានាធិបតី Nicolas Maduro និងភរិយារបស់លោក កាលពីថ្ងៃចុងសប្តាហ៍កន្លងទៅ ដោយបញ្ចប់ការគ្រប់គ្រងផ្តាច់ការកាន់តែខ្លាំងឡើងរយៈពេល១២ឆ្នាំដោយមេដឹកនាំឆ្វេងនិយមរូបនេះ ដែលទីក្រុងវ៉ាស៊ីនតោនបានចោទប្រកាន់ពីបទដឹកនាំក្រុមជួញដូរគ្រឿងញៀន ។ ចិន រុស្ស៊ី និងកូឡុំប៊ី បានចាត់ទុកប្រតិបត្តិការយោធាសហរដ្ឋអាមេរិកថា ខុសច្បាប់ ។ 

កាលពីថ្ងៃចន្ទម្សិលមិញនេះដែរ ប្រធានាធិបតីចិនលោក Xi Jinping បានជំរុញឲ្យប្រទេសទាំងអស់គោរពច្បាប់អន្តរជាតិ និងគោលការណ៍ធម្មនុញ្ញរបស់ UN ។ លោកថា ប្រទេសមហាអំណាចគួរតែធ្វើជាគំរូគេ ខណៈរូបលោកពុំនិយាយចំឈ្មោះសហរដ្ឋអាមេរិក ឬវេណេស៊ុយអេឡា ៕