រដ្ឋាភិបាលកូឡុំប៊ី និយាយកាលពីថ្ងៃចន្ទថា ប្រទេសនៅអាមេរិកខាងត្បូងមួយនេះ នឹងបន្តធ្វើការជាមួយសហរដ្ឋអាមេរិក ដើម្បីប្រយុទ្ធប្រឆាំងនឹងការជួញដូរគ្រឿងញៀន ដោយប្រើប្រាស់ព័ត៌មានចារកម្ម និងបច្ចេកវិទ្យារបស់ទីក្រុងវ៉ាស៊ីនតោន ។

រដ្ឋមន្រ្តីក្រសួងមហាផ្ទៃកូឡុំប៊ីលោក Armando Benedetti និយាយនៅក្នុងវីដេអូជាមួយរដ្ឋមន្រ្តីក្រសួងយុត្តិធម៌លោក Andres Idarraga ដែលត្រូវបានផ្ញើរជូនក្រុមអ្នកសារព័ត៌មានដោយរដ្ឋាភិបាលថា ពួកយើងនឹងបន្តសម្របសម្រួល និងសហប្រតិបត្តិការ ក្នុងការប្រយុទ្ធប្រឆាំងការជួញដូរគ្រឿងញៀន ។

កាលពីថ្ងៃអាទិត្យកន្លងទៅ ប្រធានាធិបតីសហរដ្ឋអាមេរិកលោក Donald Trump បានហៅសមភាគីកូឡុំប៊ីលោក Gustavo Petro ថាលែងធ្វើការកើតទៀតហើយ ហើយលោកនិយាយថា ប្រតិបត្តិការយោធាសហរដ្ឋអាមេរិក នៅក្នុងប្រទេសមួយនេះ អាចនឹងកើតមានឡើង ។

កាលពីចុងសប្តាហ៍កន្លងទៅ ទាហានសហរដ្ឋអាមេរិក បានចូលក្នុងប្រទេសវេណេស៊ុយអេឡា និងបានចាប់ខ្លួនលោកប្រធានាធិបតី Nicolas Maduro ដែលកាលពីថ្ងៃចន្ទ បានផ្តល់ចម្លើយគ្មានទោសនៅក្នុងតុលាការរដ្ឋញូវយ៉ក ជុំវិញករណីចោទប្រកាន់ពីបទភេរវកម្មគ្រឿងញៀន ។

លោក Benedetti និយាយថា ប្រតិបត្តិការប្រឆាំងគ្រឿងញៀនរបស់កូឡុំប៊ី នឹងមានគោលដៅលើមន្ទីរពិសោធន៍គ្រឿងញៀន អង្គការឧក្រិដ្ឋកម្ម និងជំរំលាក់ខ្លួនរបស់ពួកគេ ។

ដោយឡែក លោក Idarraga និយាយដែរថា ពួកយើងនឹងបន្តសង្គត់ធ្ងន់ពីការប្រយុទ្ធប្រឆំាង គ្រោះមហន្តរាយមួយនេះ ជាពិសេសនៅតាមព្រំដែនកូឡុំប៊ី-វេណេស៊ុយអេឡា ។

កូឡុំប៊ី បានរិះគន់សេចក្តីអត្ថាធិប្បាយកាលពីថ្ងៃអាទិត្យរបស់លោក Trump ហើយពួកគេនិយាយថា ការឈ្លានពានដែលអាចកើតមានណាមួយរបស់សហរដ្ឋអាមេរិក នឹងក្លាយជាការជ្រៀតជ្រែកជ្រុលហួសហេតុ ។

សហរដ្ឋអាមេរិកកំពុងដាក់សម្ពាធកូឡុំប៊ីឲ្យបង្កើនការប្រយុទ្ធប្រឆាំងនឹងការជួញដូរគ្រឿងញៀន ស្របពេលដែលការដាំដុះស្លឹកកូកា ដែលជាវត្ថុធាតុដើមប្រើប្រាស់សម្រាប់ផលិតកូកាអ៊ីន បានហក់ឡើងខ្ពស់ ក្នុងរយៈពេលប៉ុន្មានឆ្នាំចុងក្រោយនេះ ។

ទោះបីជាយ៉ាងណាក៏ដោយ រដ្ឋាភិបាលរបស់លោក Petro បាននិយាយការពារថា ពួកគេរឹបអូសបានសារធាតុកូកាអ៊ីនក្នុងកម្រិតពុំធ្លាប់មានពីមុនមក រួមទំាងការរឹបអូសសារធាតុកូកាអ៊ីនទម្ងន់ជិត ១ពាន់តោន កាលពីឆ្នាំ ២០២៥ ៕