រយៈពេល ១ឆ្នាំ ក្រោយការដួលរលំទៅរបស់អតីតប្រធានាធិបតីស៊ីរីលោក Bashar al-Assad ពលរដ្ឋស៊ីរីជម្លៀសខ្លួនរាប់ពាន់នាក់ បន្តជាប់ខ្លួននៅក្នុងជំរំបណ្តោះអាសន្ននៅទូទាំងតំបន់ភាគខាងជើងប្រទេសមួយនេះ ដោយពួកគេប្រឈមនឹងអាកាសធាតុត្រជាក់ធ្លាក់ព្រិល អំឡុងរដូវរងា ។

នៅជំរំ Shams ស្ថិតនៅតំបន់ជនបទនៃទីក្រុង ធ Aleppoជិតជំរំ Azaz សំពត់តង់គ្របដណ្តប់ដោយព្រិលក្នុងសប្តាហ៍នេះ ពេលដែលគ្រួសារជម្លៀសខ្លួនយកប៉ែលកើបព្រិលទាំងនេះ ចេញពីជម្រករបស់ពួកគេ ។

រូបភាពយានដ្រូនកាលពីថ្ងៃចន្ទ ឃើញសំពត់តង់គ្របដណ្តប់ដោយព្រិលសក្បុសហ៊ុមព័ទ្ធដោយភក់ ។ ក្មេងៗមួយចំនួន ជួបជុំគ្នានៅជិតសំពត់តង់ ខណៈក្មេងខ្លះទៀត ដើរកាត់ផ្លូវមានភក់ ។

លោក Ammoun Saoud គឺជាពលរដ្ឋជម្លៀសខ្លួនមួយរូប និយាយថា សំពត់តង់ជាច្រើនបានបាក់ ហើយពួកយើងនាំគ្នាស្រែកសុំឲ្យព្រះជួយ ។ ព្រិលបានធ្លាក់លើសំពត់តង់របស់គ្រួសារជម្លៀសខ្លួន ខណៈដែលទឹកបានធ្វើឲ្យសម្ភារៈនៅក្នុងសំពត់តង់សើមជោក ។

ឧត្តមស្នងការជនភៀសខ្លួនអង្គការសហប្រជាជាតិ(UNHCR)បាននិយាយថា ពួកគេបានធ្វើការដើម្បីសង់សំពត់តង់ថ្មីចំនួន ៣.៩២៤នៅទូទាំងតំបន់ភាគពាយ័ព្យស៊ីរី ដើម្បីឆ្លើយតបចំពោះតម្រូវការបន្ទាន់ អំឡុងរដូវរងា ។

យោងតាមការអះអាងរបស់ UNHCR បានឲ្យដឹងថា ពលរដ្ឋស៊ីរីជាង ៣លាននាក់ បានវិលត្រឡប់ទៅកាន់ផ្ទះសម្បែងរបស់ពួកគេ ចាប់តាំងពីការដួលរលំទៅនៃរបបគ្រប់គ្រងរបស់លោក Assad កាលពីខែធ្នូ ឆ្នាំ ២០២៤ ៕