មន្រ្តីជាន់ខ្ពស់មួយរូបនិយាយកាលពីថ្ងៃចន្ទថា ស្រីលង្កាមានគោលដៅសម្រេចឲ្យបានការមកដល់របស់ភ្ញៀវទេសចរ ៣លាននាក់ ក្នុងឆ្នាំ ២០២៦នេះ ក្រោយការមកដល់ចំនួនភ្ញៀវទេសចរជាប់កំណត់ត្រា ២,៣៦លាននាក់ កាលពីឆ្នាំមុន ស្របពេលដែលប្រទេសមួយនេះ ព្យាយាមងើបឡើងវិញពីព្យុះស៊ីក្លូន Ditwah ។

ល្បីល្បាញថាមានឆ្នេរខ្សាច់ស្អាត ប្រសាទបុរាណ និងតែស៊ីឡុង វិស័យទេសចរណ៍ គឺជាអ្នករកចំណូលប្តូរប្រាក់បរទេសធំបំផុតទី ២របស់ស្រីលង្កា ជាមួយប្រាក់ចំណូល ៣,២លានដុដល្លារ កាលពីឆ្នាំ ២០២៥ ។

លោក Vijitha Herath គឺជារដ្ឋមន្រ្តីក្រសួងការបរទេស និយាយថា គោលដៅទេសចរណ៍ដែលមានបំណងធ្វើឲ្យកើនឡើងចំនួន ២៧ភាគរយពីឆ្នាំមុននោះ នឹងជួយស្រីលង្កាស្តាឡើងវិញពីព្យុះស៊ីក្លូន Ditwah ដែលបានវាយប្រហារប្រទេសកោះមួយនេះ កាលពីដំណាច់ខែវិច្ឆិកា ដោយបានសម្លាប់មនុស្ស ៦៤៥នាក់ ។

យោងតាមការប៉ាន់ស្មានរបស់ធនាគារពិភពលោក បានឲ្យដឹងថា ភ្លៀងធ្លាក់ខ្លាំង និងបំណាក់ដី បណ្តាលឲ្យខូចខាតផ្ទះសម្បែងប្រជាពលរដ្ឋជាង ១១ម៉ឺនខ្នង ក៏ដូចជាផ្លូវថ្នល់ ផ្លូវរថភ្លើង ស្ពាន ហើយនិងបណ្តាលឲ្យខាតបង់សេដ្ឋកិច្ចចំនួន ៤,១ពាន់លានដុល្លារ ។

លោក Buddhika Hewawasam គឺជាប្រធានអាជ្ញាធរអភិវឌ្ឍន៍ទេសចរណ៍ស្រីលង្កា និយាយថា ស្រីលង្កា មានបំណងផងដែរក្នុងការសម្រេចឲ្យបានការវិនិយោគទឹកប្រាក់ ៥០០លានដុល្លារលើវិស័យទេសចរណ៍ ក្នុងឆ្នាំ ២០២៦ ក្រោយទាក់ទាញការវិនិយោគ ៣២៩លានដុល្លារពី ១២៦គម្រោង កាលពីឆ្នាំមុន ៕