ក្រសួងការបរទេសកាតា បាននិយាយថា ទីក្រុងដូហា កំពុងសហការជាមួយអ្នកសម្របសម្រួលដើម្បីបើកច្រកឆ្លងកាត់ Rafah ដ៏សំខាន់ឡើងវិញ ចូលទៅក្នុងតំបន់ហ៊ុមព័ទ្ធ ហ្កាហ្សា និងផ្តល់ជំនួយដល់ជនភៀសខ្លួន ខណៈរិះគន់ខ្លាំងៗលើអ៊ីស្រាអែល ដែលកំពុងបង្កើតឧបសគ្គ។

ក្នុងសន្និសីទសារព័ត៌មានមួយកាលពីថ្ងៃអង្គារ (៦ មករា) លោក Majed al-Ansari អ្នកនាំពាក្យក្រសួងការបរទេសកាតា បាននិយាយថា ការទំនាក់ទំនងកំពុងដំណើរការលើការបើកច្រកឡើងវិញ ប៉ុន្តែសេចក្ដីលម្អិតមិនទាន់មានភ្លាមៗទេ។ លោកបានលើកឡើងថា «កាតាកំពុងធ្វើការជាមួយអ្នកសម្របសម្រួល ដើម្បីធានានូវការឈានដល់ដំណាក់កាលទីពីរនៃបទឈប់បាញ់ហ្កាហ្សា»។ កាតា ក៏បានទាមទារយ៉ាងមុតមាំថា ជំនួយមនុស្សធម៌មិនគួរត្រូវបានប្រើប្រាស់ជា «ការគំរាមកំហែងនយោបាយ» ជាដាច់ខាត។

កិច្ចប្រឹងប្រែងនេះ បានកើតឡើងស្របពេលមានរបាយការណ៍របស់អ៊ីស្រាអែលថា អ៊ីស្រាអែល និងសហរដ្ឋអាមេរិក អាចនឹងពិចារណាមិនបើកច្រកឆ្លងកាត់ Rafah ដ៏សំខាន់ឡើងវិញ នៅតាមព្រំដែនជាមួយអេហ្ស៊ីប លុះត្រាតែសាកសពចំណាប់ថ្នូរជនជាតិអ៊ីស្រាអែលចុងក្រោយនៅហ្កាហ្សា ត្រូវបានរកឃើញ និងប្រគល់ជូនអ៊ីស្រាអែលវិញ។

គួរឱ្យដឹងថា ការបើកច្រក Rafah ឡើងវិញ គឺជាលក្ខខណ្ឌមួយនៃដំណាក់កាលដំបូងក្នុងបទឈប់បាញ់ ដែលបានចូលជាធរមានតាំងតែពីថ្ងៃទី១០ ខែតុលា ឆ្នាំ២០២៥មក ប៉ុន្តែច្រកនេះនៅតែបិទទ្វារ ខណៈក្រុមមនុស្សធម៌និយាយថា ការរឹតបន្តឹងរបស់អ៊ីស្រាអែល នៅតែបន្តរារាំងដល់ការដឹកជញ្ជូនជំនួយ៕