ការិយាល័យកិច្ចការតៃវ៉ាន់របស់ប្រទេសចិន បាននិយាយនៅថ្ងៃពុធ (៧ មករា) នេះថា ប្រទេសចិន នឹងចាត់វិធានការដាក់ទណ្ឌកម្ម ប្រឆាំងនឹងអ្នកកោះតៃវ៉ាន់ ៣នាក់ ចំពោះការជាប់ពាក់ព័ន្ធរបស់ពួកគេ នៅក្នុងសកម្មភាពផ្ដាច់ខ្លួន ដែលទាក់ទងនឹង «ឯករាជ្យភាពរបស់តំបន់តៃវ៉ាន់»។ ម្នាក់ក្នុងចំណោមមនុស្សទាំងនោះ ត្រូវបានដាក់ឈ្មោះថា ជាអ្នកសមគំនិតក្នុងសកម្មភាពផ្ដាច់ខ្លួន ហើយនឹងត្រូវទទួលខុសត្រូវ «អស់មួយជីវិត»។

អ្នកនាំពាក្យការិយាល័យ លោក Chen Binhua បានប្រាប់អ្នកយកព័ត៌មានក្នុងសន្និសីទសារព័ត៌មានប្រចាំសប្តាហ៍ថា បុគ្គល ២នាក់ ផ្សេងទៀត រួមទាំងសាច់ញាតិរបស់ពួកគេ នឹងត្រូវហាមឃាត់មិនឱ្យចូលទៅក្នុងប្រទេសចិនដីគោក ទីក្រុងហុងកុង និងម៉ាកាវឡើយ។ គួរឱ្យដឹងថា ប្រទេសចិន បានអះអាងសិទ្ធិលើកោះតៃវ៉ាន់ ថាជាទឹកដីរបស់ខ្លួន។

លោក Chen បាននិយាយទៀតថា គោលបំណងនៃសកម្មភាពប្រឆាំងនឹង «អ្នកតស៊ូមតិឯករាជ្យភាពតៃវ៉ាន់» មួយចំនួនតូចនេះ គឺដើម្បី «ការពារអធិបតេយ្យភាពជាតិ និងបូរណភាពទឹកដីជាមូលដ្ឋាន» ហើយថា ចំណាត់ការនេះមិនមានគោលបំណងសំដៅលើអ្នកស្រុកតៃវ៉ាន់ ជាទូទៅនោះទេ៕