ប្រធានាធិបតីស្តីទីប្រទេសវ៉េណេស៊ុយអេឡា លោកស្រី ឌែលស៊ី រ៉ូទ្រីហ្គេស(Delcy Rodriguez) កាលពីថ្ងៃអង្គារ ទី៦ ខែមករា បានប្រកាសកាន់ទុក្ខរយៈពេល៧ថ្ងៃសម្រាប់សមាជិកយោធាដែលបានស្លាប់នៅក្នុងការវាយឆ្មក់របស់សហរដ្ឋអាមេរិកកាលពីចុងសប្តាហ៍ ដើម្បីចាប់ខ្លួនមេដឹកនាំប្រទេស លោក Nicolas Maduro។ យោងតាមរដ្ឋាភិបាលអាមេរិកខាងត្បូងមួយនេះបានឲ្យដឹងថា មន្ត្រីវ៉េណេស៊ុយអេឡាប្រហែលជាង២០នាក់ត្រូវបានសម្លាប់ ខណៈមានអ្នកស្លាប់សរុបមានរហូតដល់ជាង១១០នាក់រួមទាំងយោធាគុយបា នៅក្នុងការវាយប្រហារនេះ។

រដ្ឋាភិបាលគុយបា បាននិយាយកាលពីថ្ងៃអាទិត្យថា មន្ត្រីយោធានិងនគរបាលចំនួន៣២នាក់ដែលបានបម្រើការនៅក្នុងប្រទេសវ៉េណេស៊ុយអេឡាត្រូវបានសម្លាប់ ហើយបានប្រកាសកាន់ទុក្ខរយៈពេលពីរថ្ងៃ។

ចំនួនអ្នកស្លាប់នៅក្នុងប្រតិបត្តិការយោធាសហរដ្ឋអាមេរិកដើម្បីចាប់ខ្លួនប្រធានាធិបតីវ៉េណេស៊ុយអេឡា លោក Nicolas Maduro បានកើនឡើងគួរឱ្យកត់សម្គាល់។ យោងតាមរបាយការណ៍មួយនៅក្នុងកាសែត The New York Times ដោយដកស្រង់សម្តីមន្ត្រីជាន់ខ្ពស់វ៉េណេស៊ុយអេឡាបានឱ្យដឹងថា ចំនួនអ្នកស្លាប់អាចកើនឡើងបន្ថែមទៀត ដោយសារការវាយតម្លៃនៅតែបន្ត។

ចំនួនអ្នកស្លាប់ខ្ពស់ បានបង្ហាញពីកម្រិតធ្ងន់ធ្ងរនៃសកម្មភាពយោធា ដែលធ្វើឡើងដោយកងកម្លាំងសហរដ្ឋអាមេរិកលើទឹកដីវ៉េណេស៊ុយអេឡា ដើម្បីចាប់ខ្លួនប្រមុខរដ្ឋដែលកំពុងកាន់អំណាច។ ប្រធានាធិបតីសហរដ្ឋអាមេរិក លោក Donald Trump បានបញ្ជាក់ថា ប្រតិបត្តិការនេះបាននាំឱ្យមានការចាប់ខ្លួនលោក Maduro និងភរិយារបស់លោក គឺលោកស្រី Cilia Flores ដោយជោគជ័យ ៕