ទីភ្នាក់ងារស្ទង់ភូគព្ភសាស្ត្រសហរដ្ឋអាមេរិក (USGS) បាននិយាយថា គ្រោះរញ្ជួយដីកម្រិត ៦,៧ រ៉ិចទ័រ ដ៏ខ្លាំងក្លា បានវាយប្រហារនៅប្រជុំកោះភាគខាងត្បូងនៃប្រទេសហ្វីលីពីន ក្នុងថ្ងៃពុធ ទី៧ ខែមករា ឆ្នាំ២០២៦ នេះ ហើយមិនមានរបាយការណ៍ភ្លាមៗអំពីការខូចខាត ឬអ្នករងរបួសនោះទេ ខណៈក្រោយមក ហ្វីលីពីន បានបន្ទាបកម្រិតនៃគ្រោះធម្មជាតិនេះ។

USGS បាននិយាយថា រញ្ជួយដីនេះបានវាយប្រហារនៅជម្រៅ ១០ គីឡូម៉ែត្រ ចម្ងាយប្រហែល ៦៨ គីឡូម៉ែត្រ ភាគខាងកើតនៃភូមិ Baculin ដែលជាភូមិមួយនៅក្នុងទីប្រជុំជន Hinatuan ភាគខាងត្បូងនៃខេត្ត Surigao del Sur ប្រទេសហ្វីលីពីន។

ដោយឡែក ទីភ្នាក់ងាររញ្ជួយដីហ្វីលីពីន Phivolcs បានវាស់ស្ទង់ការរញ្ជួយដីនេះក្នុងកម្រិត ៦,៤រ៉ិចទ័រ ប៉ុណ្ណោះ និងជម្រៅ ២៣គីឡូម៉ែត្រ ហើយបានព្រមានអំពីការខូចខាត និងរញ្ជួយជាបន្តបន្ទាប់។ ក្រុមនគរបាលនិងមន្ត្រីគ្រោះមហន្តរាយនៅជិតចំណុចកណ្តាលនៃរញ្ជួយដី បាននិយាយថា ពុំមានរបាយការណ៍ភ្លាមៗអំពីការខូចខាត ឬរបួសពីគ្រោះធម្មជាតិនេះទេ។

នាយកទីភ្នាក់ងារ Phivolcs លោក Teresito Bacolcol បាននិយាយថា ចំណុចកណ្តាលនៃរញ្ជួយ ស្ថិតនៅចម្ងាយតិចជាង ១០គីឡូម៉ែត្រ ពីកន្លែងដែលធ្លាប់មានរញ្ជួយដីដ៏ខ្លាំងមួយកាលពីខែតុលាកន្លងទៅ ដែលបានសម្លាប់មនុស្ស ៧នាក់។ លោកបន្ថែមថា ការព្រមានអំពីរលកយក្សស៊ូណាមិ ទំនងជាមិនកើតមានពីការរញ្ជួយដីនៅថ្ងៃពុធនេះទេ៕