អនុប្រធានាធិបតីសហរដ្ឋអាមេរិក លោក JD Vance កាលពីថ្ងៃអង្គារ (ទី៦ ខែមករា ឆ្នាំ២០២៦) បាននិយាយថា ប្រតិបត្តិការយោធា នៅក្នុងប្រទេសវ៉េណេស៊ុយអេឡា គឺមានគោលបំណងទប់ស្កាត់ការផ្តល់មូលនិធិដល់អំពើភេរវកម្ម និងផ្តល់ឲ្យក្រុងវ៉ាស៊ីនតោននូវការគ្រប់គ្រងកាន់តែប្រសើរជាងមុន លើធនធានថាមពលពិភពលោក។

អំឡុងពេលនិយាយទៅកាន់បណ្តាញសារព័ត៌មាន Salem News លោក Vance បានប្រាប់ថា សហរដ្ឋអាមេរិកចង់បានអ្វីដែលល្អបំផុត ទាំងសម្រាប់ប្រជាជនវ៉េណេស៊ុយអេឡា និងប្រជាជនអាមេរិក។

លោកបានបញ្ជាក់ថា «អ្នកណាក៏ដោយដែលជាមេដឹកនាំនៃប្រទេសនោះ នឹងត្រូវតែសហការជាមួយសហរដ្ឋអាមេរិក» ដោយលោកបានសង្កត់ធ្ងន់ថា គោលនយោបាយវ៉េណេស៊ុយអេឡាពីមុន បានអនុញ្ញាតឲ្យដៃគូប្រកួតប្រជែងបរទេសទទួលបានថាមពលមានតម្លៃថោក ខណៈពេលដែលប្រើប្រាស់ប្រាក់ចំណូល ដើម្បីផ្តល់មូលនិធិដល់សកម្មភាពដែលគំរាមកំហែងដល់សហរដ្ឋអាមេរិក។

គួរបញ្ជាក់ថា លោកប្រធានាធិបតី Donald Trump បាននិយាយកាលពីថ្ងៃទី៣ ខែមករាថា ប្រតិបត្តិការយោធានាំឲ្យមានការចាប់ខ្លួនប្រធានាធិបតី លោក Nicolas Maduro និងភរិយា គឺលោកស្រី Cilia Flores ហើយបានសន្យាថា នឹងអះអាងការគ្រប់គ្រងរបស់អាមេរិកលើវ៉េណេស៊ុយអេឡាជាបណ្ដោះសអាសន្ន ដោយកងទ័ពអាមេរិក ប្រសិនបើចាំបាច់។

លោក Vance បាននិយាយថា៖ «អ្វីដែលលោកប្រធានាធិបតីបានធ្វើ និងប្រាកដណាស់ អ្វីដែលក្រុមទាំងមូលធ្វើឲ្យកើតឡើងបាន គឺដើម្បីកាត់ផ្តាច់លំហូរនៃប្រាក់ថាមពលដល់ពួកភេរវករគ្រឿងញៀន ហើយពិតណាស់ ការធ្វើបែបនោះ គឺកាត់ផ្តាច់នូវបរិមាណនៃគ្រឿងញៀនដែលត្រូវបាននាំចូលទៅសហរដ្ឋអាមេរិក»។ 

លោកបានបន្ថែមថា ចំណាត់ការនេះត្រូវបានគេរំពឹងថា នឹងកាត់បន្ថយតម្លៃឧស្ម័ន និងថាមពល សម្រាប់ប្រជាជនអាមេរិក ខណៈពេលដែលជួយសង្គ្រោះជីវិតមនុស្សយ៉ាងច្រើន៕