អនុប្រធានក្រុមប្រឹក្សាសន្តិសុខរុស្ស៊ី លោក Dmitry Medvedev បានចម្លងតាមក្រាហ្វិករូបភាពរបស់ក្រសួងការបរទេសអាមេរិក កាលពីល្ងាចថ្ងៃអង្គារ (ទី៦ ខែមករា ឆ្នាំ២០២៦) ដោយបានចេញការព្រមាន «កុំព្យាយាមលេងហ្គេម» ទៅកាន់ទីក្រុងវ៉ាស៊ីនតោន ដែលបានឆ្លុះបញ្ចាំងនូវសាររបស់សហរដ្ឋអាមេរិក ទាក់ទងនឹងលោកប្រធានាធិបតី Donald Trump។

អមដោយការចែករំលែករូបភាពសខ្មៅនៃវិហារកាតូលិក Christ the Saviour របស់ទីក្រុងមូស្គូ លោក Medvedev បានសរសេរនៅលើបណ្ដាញសង្គម X ថា៖ «រីករាយថ្ងៃបុណ្យណូអែលអូស្សូដក់។ នេះគឺពិភពរុស្ស៊ី!»។ ហើយនៅលើរូបភាពនោះ មានសរសេរអក្សរដិតក្រហមធំៗថា «កុំព្យាយាមលេងហ្គេមជាមួយប្រទេសរុស្ស៊ី»។

ការបង្ហោះនេះ គឺជាការតបត ចំពោះរូបភាព ដែលត្រូវបានផ្សព្វផ្សាយដោយគណនីជាភាសារុស្សីរបស់ក្រសួងការបរទេសសហរដ្ឋអាមេរិក។ ការបង្ហោះរបស់អាមេរិក បានរំលេចរូបថតសខ្មៅរបស់លោកប្រធានាធិបតី Trump និងរដ្ឋមន្ត្រីការបរទេស លោក Marco Rubio ដែលកំពុងត្រួតពិនិត្យមើលប្រតិបត្តិការយោធា នៅក្នុងប្រទេសវ៉េណេស៊ុយអេឡា អមដោយសារសរសេរថា «កុំលេងហ្គេមជាមួយលោកប្រធានាធិបតី TRUMP»។

ចំណងជើងរបស់ក្រសួងការបរទេស បានពណ៌នាលោក Trump ថា ជា «មនុស្សធ្វើពិត» ដោយបន្ថែមសំណួរ និងចម្លើយជាវោហាសាស្ត្រថា «តើអ្នកមិនដឹងទេឬ? ឥឡូវនេះអ្នកដឹងហើយមែនទេ»។ ហើយការឆ្លើយតបរបស់លោក Medvedev បានយកត្រាប់តាមពុម្ពអក្សរច្បាស់ៗ ពណ៌ចម្រុះ និងឃ្លាដែលប្រើដោយទីក្រុងវ៉ាស៊ីនតោន ដោយនេះជាសញ្ញាដែលបង្ហាញពីការកើនឡើងនូវវោហាសាស្ត្រ បន្ទាប់ពីមានព្រឹត្តិការណ៍នៅទីក្រុងការ៉ាកាស។

ការតបសារតាមឌីជីថលទៅវិញទៅមកនេះ កើតឡើងប៉ុន្មានថ្ងៃបន្ទាប់ពីមានប្រតិបត្តិការយោធាអាមេរិក ក្នុងរដ្ឋធានីរបស់វ៉េណេស៊ុយអេឡា កាលពីថ្ងៃទី៣ ខែមករា។ របាយការណ៍បានបង្ហាញពីការផ្ទុះ និងសកម្មភាពយន្តហោះ នៅពីលើទីក្រុងការ៉ាកាស មុនពេលកងកម្លាំងអាមេរិក បានចាប់ខ្លួនប្រធានាធិបតីវ៉េណេស៊ុយអេឡា លោក Nicolas Maduro និងភរិយារបស់លោក៕