លោកប្រធានាធិបតី Vladimir Putin បានចូលរួមពិធីបុណ្យណូអែលនិកាយអូស្សូដក់របស់រុស្ស៊ី នាព្រឹកថ្ងៃពុធ (ទី៧ ខែមករា ឆ្នាំ២០២៦) ហើយបានសាទរចំពោះ «បេសកកម្មដ៏បរិសុទ្ធ» នៃកងទ័ពរបស់លោក ដើម្បីការពារប្រទេសរុស្ស៊ី ដោយភ្ជាប់ពិធីនេះជាមួយនឹងសុន្ទរកថាថ្ងៃបុណ្យ ស្តីពីសាមគ្គីភាព សប្បុរសធម៌ និងការគាំទ្រដល់កងកម្លាំងប្រដាប់អាវុធ។

វត្តមានរបស់លោកបានលេចឡើង នៅពេលដែលសង្រ្គាមដែលរុស្ស៊ីបានចាប់ផ្តើមដោយការលុកលុយទ្រង់ទ្រាយធំរបស់ខ្លួន លើអ៊ុយក្រែន ជិតគ្រប់ពេញ ៤ឆ្នាំហើយ ដោយវិមានក្រឹមឡាំង បានដាក់ឈ្មោះជម្លោះនេះថា ជាបេសកកម្មជាតិ ហើយពឹងផ្អែកយ៉ាងខ្លាំង លើនិមិត្តសញ្ញាស្នេហាជាតិ និងសាសនា។

នៅរុស្ស៊ី ពិធីបុណ្យណូអែលអូស្សូដក់ ដែលជាពិធីបុណ្យរបស់អ្នកកាន់សាសនាគ្រិស្តនិកាយអូស្សូដក់ ត្រូវបានប្រារព្ធឡើងនៅពាក់កណ្តាលអធ្រាត្រ ដោយមានការជួបជុំសូត្រធម៌តាមប្រពៃណីសាសនា តែដោយភាគច្រើនលោក Putin បានចូលរួមក្នុងពិធីតូចៗ ក្នុងនោះរួមទាំងនៅខាងក្នុងវិហាររបស់វិមានក្រឹមឡាំង។

តាមរយៈរូបភាពវីដេអូ គេបានឃើញលោក Putin ក្នុងឈុតសម្លៀកបំពាក់ពណ៌ខ្មៅដោយគ្មានក្រវាត់ក ស្ថិតនៅក្នុងចំណោមទាហានឯកសណ្ឋាន រួមជាមួយនឹងភរិយា និងកូន ខណៈដែលបព្វជិត បានធ្វើពិធី នៅឯវិហារកាតូលិក St George Victory Bearer ក្បែរទីក្រុងមូស្គូ។

លោក Putin បាននិយាយនៅឯវិហារនោះបន្ទាប់ពីពិធីបុណ្យថា៖ «អ្នកចម្បាំងរបស់រុស្ស៊ី ដូចតាមការបង្គាប់បញ្ជារបស់ព្រះអម្ចាស់ តែងតែអនុវត្តបេសកកម្មនេះ ដើម្បីការពារមាតុភូមិ និងប្រជាជនរបស់ខ្លួន ពោលគឺសង្គ្រោះមាតុភូមិ និងប្រជាជន។ គ្រប់ពេលវេលា នៅក្នុងប្រទេសរុស្ស៊ី នេះជារបៀបដែលប្រជាជន បានចាត់ទុកអ្នកចម្បាំងរបស់ពួកគេថា ជាអ្នកដែលបំពេញបេសកកម្មដ៏បរិសុទ្ធនេះ ដូចតាមការបង្គាប់បញ្ជារបស់ព្រះអម្ចាស់»៕