កាសែត Wall Street Journal រាយការណ៍ដោយលើកសម្តីមន្រ្តីសហរដ្ឋអាមេរិកថា រុស្ស៊ីបានបញ្ជូននាវាមុជទឹក ១គ្រឿង និងនាវាកងទ័ពជើងទឹកជាច្រើនគ្រឿងទៀត ទៅអមដំណើរនាវាដឹកប្រេង Bella 1 ។

 កងកម្លាំងសហរដ្ឋអាមេរិក បានតាមប្រម៉ាញ់នាវាចាស់មួយគ្រឿងនេះ អស់រយៈពេល ជិត ៣សប្តាហ៍មកហើយ ។

 នាវា Bella 1 បានព្យាយាមគេចវេះពីការបិទផ្លូវរបស់សហរដ្ឋអាមេរិកអស់រយៈពេលជាង ២សប្តាហ៍មកហើយ នៅជិតប្រទេសវេណេស៊ុយអេឡា ហើយនាវាមួយគ្រឿងនេះ មិនអាចចូលចត និងផ្ទុកប្រេងនៅវេណេស៊ុយអេឡា បាននោះឡើយ ។

 បើទោះបីជាគ្មានប្រេងយ៉ាងណាក្តី កងឆ្មាំល្បាតឆ្នេរសហរដ្ឋអាមេរិក បានព្យាយាមដេញតាមចាប់នាវាមួយគ្រឿងនេះ នៅក្នុងមហាសមុទ្រអាត្លង់ទិក ជាការប៉ុនប៉ងគាបសង្កត់កងនាវាដឹកប្រេងខុសច្បាប់នៅជុំវិញពិភពលោក រួមទាំងប្រេងក្នុងទីផ្សារងងឹតលក់ដោយរុស្ស៊ីផងដែរ ។

 ក្រុមនាវិករបស់នាវាមួយគ្រឿងនេះ បានរារាំងការប៉ុនប៉ងឡើងលើនាវារបស់ពួកគេពីសំណាក់សហរដ្ឋអាមេរិកកាលពីខែធ្នូ ហើយនិងបានធ្វើដំណើរចូលទៅក្នុងមហាសមុទ្រអាត្លង់ទិក ។

 ពេលដែលក្រុមឆ្មាំល្បាតឆ្នេរសហរដ្ឋអាមេរិក ដេញតាម ក្រុមនាវិក បានលាបពណ៌ទង់ជាតិរុស្ស៊ីនៅលើនាវា និងបានប្តូរឈ្មោះទៅជានាវា Marinera ក៏ដូចជាផ្លាស់ប្តូរការចុះបញ្ជីជារបស់រុស្ស៊ីផងដែរ ។

 ក្រុមអ្នកជំនាញនិយាយថា រុស្ស៊ីមានការព្រួយបារម្ភចំពោះការរឹបអូសរបស់សហរដ្ឋអាមេរិកនូវនាវាដឹកប្រេងខុសច្បាប់ជុំវិញពិភពលោករបស់ពួកគេ ហើយពួកគេបានចាត់វិធានការខុសពីមុន ដើម្បីអនុញ្ញាតឲ្យនាវាដឹកប្រេងចុះបញ្ជីនៅក្នុងប្រទេសរុស្ស៊ី ដោយពុំចាំបាច់ត្រួតពិនិត្យ ឬធ្វើបែបបទឯកសារផ្សេងទៀតនោះឡើយ ៕