ប្រមុខយោធាអ៊ីរ៉ង់ នៅថ្ងៃពុធ (ទី៧ ខែមករា ឆ្នាំ២០២៦) នេះ បានព្រមានថា អ៊ីរ៉ង់នឹងមិននៅស្ងៀម ហើយអនុញ្ញាតឲ្យមានការគំរាមកំហែងមកលើខ្លួន ពីសំណាក់មហាអំណាចខាងក្រៅ បន្ទាប់ពីសហរដ្ឋអាមេរិក និងអ៊ីស្រាអែលគាំទ្រចលនាតវ៉ាប្រឆាំងរដ្ឋាភិបាល។

បើយោងតាមទីភ្នាក់ងារសារព័ត៌មាន Fars បានឲ្យដឹងថា លោកឧត្តមសេនីយ៍ Amir Hatami បាននិយាយថា៖ «សាធារណរដ្ឋឥស្លាមអ៊ីរ៉ង់ ចាត់ទុកការបង្កើននូវវោហាសាស្ត្រអរិភាព ប្រឆាំងនឹងប្រជាជាតិអ៊ីរ៉ង់ថា ជាការគំរាមកំហែង ហើយនឹងមិនអត់ធ្មត់បណ្ដោយឲ្យការបន្តបែបនេះកើតមានឡើងដោយគ្មានការឆ្លើយតបនោះឡើយ»។

គួរបញ្ជាក់ថា ប៉ុន្មានថ្ងៃថ្មីៗនេះ ប្រធានាធិបតីអាមេរិក លោក Donald Trump បានគំរាមធ្វើអន្តរាគមន៍ ក្នុងប្រទេសអ៊ីរ៉ង់ ប្រសិនបើបាតុករត្រូវបានសម្លាប់ ខណៈដែលនាយករដ្ឋមន្ត្រីអ៊ីស្រាអែល លោក Benjamin Netanyahu បានសម្តែងការគាំទ្រ ចំពោះការតវ៉ា។

រលកនៃការតវ៉ា បានចាប់ផ្តើមនៅថ្ងៃទី២៨ ខែធ្នូ ឆ្នាំ២០២៥ ដោយក្រុមអាជីវករបានបិទផ្សារ នៅទីក្រុងតេអេរ៉ង់ ដែលជាមជ្ឈមណ្ឌលសេដ្ឋកិច្ចជាតិ។ ចាប់តាំងពីពេលនោះមក ការតវ៉ាបានរីករាលដាលទៅកាន់តំបន់ផ្សេងទៀត។ កងកម្លាំងសន្តិសុខអ៊ីរ៉ង់ កាលពីថ្ងៃអង្គារ (ទី៦ ខែមករា ឆ្នាំ២០២៦) បានបាញ់ឧស្ម័នបង្ហូរទឹកភ្នែក ដើម្បីបំបែកហ្វូងបាតុករ នៅឯផ្សារទីក្រុងតេអេរ៉ង់ ខណៈដែលអង្គការក្រៅរដ្ឋាភិបាលមួយ បានប្រាប់ឲ្យដឹងថា មនុស្សជិត ៣០នាក់ ត្រូវបានសម្លាប់នៅក្នុងការបង្ក្រាបលើការតវ៉ាដ៏ធំបំផុត ដែលកើតមាននៅសាធារណរដ្ឋឥស្លាមជាលើកដំបូង ក្នុងរយៈពេល ៣ឆ្នាំ៕