មនុស្សយ៉ាងហោច ២២នាក់ ត្រូវបានសម្លាប់ និងមនុស្ស ៦៥នាក់ផ្សេងទៀត រងរបួស ក្រោយរថយន្តដឹកទំនិញមួយគ្រឿងផ្ទុកក្រុមអ្នកស្វែងរកសិទ្ធិជ្រកកោនអេត្យូពី និងជនអន្តោប្រវេសន៍ ក្រឡាប់នៅលើផ្លូវហាយវ៉េ ។

អាជ្ញាធរក្នុងស្រុករាយការណ៍កាលពីថ្ងៃអង្គារថា ឧបទ្ទេវហេតុគ្រោះថ្នាក់ចរាចរណ៍នេះ កើតឡើងនៅទីក្រុង Semera ស្ថិតនៅតំបន់ភាគខាងជើង Afar របស់អេត្យូពី ដែលមានចម្ងាយរាប់រយគ.មភាគខាងលិចប្រទេសជិតខាងជីប៊ូទី ។

មន្ទីរទំនាក់ទំនងតំបន់ Afar និយាយនៅក្នុងសេចក្តីថ្លែងការណ៍បង្ហោះលើបណ្តាញព័ត៌មានសង្គម Facebookថា ឧបទ្ទេវហេតុនេះ កើតឡើង ពេលដែលរថយន្តធំមួយគ្រឿងក្រឡាប់ ពេលផ្ទុកមនុស្សយ៉ាងច្រើនដែលត្រូវបានបោកប្រាស់ដោយឈ្មួញកណ្តាលខុសច្បាប់ ហើយនិងមិនដឹងពីផ្លូវគ្រោះថ្នាក់ ។

សេចក្តីថ្លែងការណ៍បន្តថា រដ្ឋាភិបាលក្នុងតំបន់ បានចុះប្រតិបត្តិកសង្រ្គោះអាយុជីវិត ចាប់តាំងពីឧបទ្ទេវហេតុកើតឡើង ហើយនៅពេលនេះ អ្នកដែលរងរបួស កំពុងទទួលបានការព្យាបាលនៅមន្ទីរពេទ្យ Doubtee Referral ។

សូមបញ្ជាក់ថា ប្រទេសអេត្យូពី គឺជាចំណុចចាកចេញដ៏សំខាន់មួយសម្រាប់ផ្លូវ Eastern Route ដែលក្រុមអ្នកស្វែងរកសិទ្ធិជ្រកកោន និងក្រុមជនអន្តោប្រវេសន៍ ចាកចេញពីអាហ្វ្រិកខាងកើត រួមទាំងប្រទេសសូម៉ាលី អេត្យូពី អេរីទ្រី និងជីប៊ូទី ដើម្បីស្វែងរកការងារធ្វើនៅបណ្តាប្រទេសនៅតំបន់ឈូងសមុទ្រ ៕