យន្តហោះចម្បាំងអារ៉ាប៊ីសាអ៊ូឌីត បានវាយឆ្មក់ស្រុកកំណើតរបស់លោក Aidarous Al-Zubaidi មេដឹកនាំក្រុមប្រឹក្សាអន្តរកាលភាគខាងត្បូង (STC) នៅក្នុងខេត្ត Al-Dhalea ភាគខាងត្បូងប្រទេសយេម៉ែន នៅព្រឹកថ្ងៃពុធនេះ។

មន្ត្រីសន្តិសុខក្នុងស្រុកម្នាក់ បានប្រាប់សារព័ត៌មានស៊ីនហួ ក្នុងលក្ខខណ្ឌមិនបញ្ចេញឈ្មោះថា ការវាយឆ្មក់នេះ មានភាពខ្លាំងក្លា ដោយការវាយប្រហារចំនួន ១៤ ដង ត្រូវបានធ្វើឡើង ក្នុងរយៈពេលខ្លី។  

មន្ត្រីរូបនេះបាននិយាយថា យន្តហោះចម្បាំងអារ៉ាប៊ីសាអ៊ូឌីត នៅតែធ្វើការហោះហើរយ៉ាងទូលំទូលាយ និងរយៈកម្ពស់ទាបឆ្លងកាត់ស្រុកជាច្រើននៃខេត្ត Al-Dhalea និងតំបន់ជិតខាងមួយចំនួនទៀត។

អ្នកស្រុកបានប្រាប់ស៊ីនហួថា ការផ្ទុះដ៏ខ្លាំងក្លាជាបន្តបន្ទាប់ ត្រូវបានគេឮ ហើយបានធ្វើឲ្យញ័ររញ្ជួយនៅទូទាំងសង្កាត់លំនៅឋានក្បែរនោះ។ ពុំមានរបាយការណ៍ផ្លូវការអំពីអ្នកស្លាប់ និងរបួស ត្រូវបានផ្តល់ភ្លាមៗនោះទេ។

ការវាយប្រហារនេះ បានកើតឡើង នៅពេលដែលប្រព័ន្ធផ្សព្វផ្សាយក្នុងស្រុកបានរាយការណ៍ថា លោក Al-Zubaidi បានចាកចេញពីទីតាំងដែលគេស្គាល់របស់ខ្លួន នៅក្នុងទីក្រុងកំពង់ផែភាគខាងត្បូងនៃទីក្រុង Aden។ លោកមិនបានឡើងយន្តហោះដែលបានគ្រោងទុកទៅកាន់ប្រទេសអារ៉ាប៊ីសាអ៊ូឌីត ជាកន្លែងដែលលោកត្រូវបានគេរំពឹងថា នឹងចូលរួមក្នុងការពិភាក្សាអំពីស្ថានភាពនៅភាគខាងត្បូងប្រទេសយេម៉ែន ហើយផ្ទុយទៅវិញបានផ្លាស់ទៅទីតាំងដែលគេមិនស្គាល់៕