នៅថ្ងៃពុធនេះ ប្រជាពលរដ្ឋកាន់ទ្រព្យសម្បត្តិរបស់ពួកគេ ត្រូវបានមើលឃើញនៅតាមដងផ្លូវនៅទីក្រុងភាគខាងជើង Aleppo ប្រទេសស៊ីរី បន្ទាប់ពីការប៉ះទង្គិចគ្នារវាងរដ្ឋាភិបាលស៊ីរី និងកងកម្លាំងប្រជាធិបតេយ្យស៊ីរី(SDF)ដឹកនាំដោយក្រុមឃើដ ។

គ្រួសារខ្លះបាននាំគ្នាឡើងជិះរថយន្តកងកម្លាំងការពារស៊ីវិល ដែលដឹកពួកគេទៅកាន់ទីជម្រក ឬទីតាំងដែលពួកគេចង់ទៅ ។

គួរឲ្យដឹងថា ការប្រយុទ្ធគ្នាយ៉ាងហិង្សាបានផ្ទុះឡើងជាថ្មីម្ដងទៀតនៅក្នុងទីក្រុង Aleppo កាលពីថ្ងៃអង្គារ បណ្តាលឲ្យមនុស្សយ៉ាងតិច ៤នាក់បានស្លាប់ និងជាច្រើននាក់ទៀតរងរបួស ហើយរដ្ឋាភិបាលស៊ីរី និងកងកម្លាំង SDF បានដាក់ការស្តីបន្ទោសលើគ្នាទៅវិញទៅមក ចំពោះអំពើហិង្សានេះ ។

ការប៉ះទង្គិចនេះ គឺជាការប៉ះទង្គិចគ្នាចុងក្រោយបំផុត ដែលបានផ្ទុះឡើងក្នុងទីក្រុង Aleppo ខណៈក្រុមមន្ត្រីកំពុងខិតខំជំរុញកិច្ចព្រមព្រៀង ដើម្បីដោះស្រាយការបាក់បែកដ៏ជ្រៅបំផុតរបស់ស៊ីរី ដោយរួមបញ្ចូលកងកម្លាំង SDF គាំទ្រដោយសហរដ្ឋអាមេរិក ទៅក្នុងរដ្ឋាភិបាលកណ្តាលថ្មី ។

ក្រោយការប៉ះទង្គិចដ៏បង្ហូរឈាមចុងក្រោយនេះដែរ ក្រសួងការពារជាតិស៊ីរី បាននិយាយក្នុងសេចក្តីថ្លែងការណ៍ថា កងកម្លាំង SDF បានបន្តបង្កើនភាពតានតឹង ដោយកំណត់គោលដៅទីតាំងកងទ័ព និងទីលំនៅដ្ឋាន នៅក្នុងទីក្រុង Aleppo ៕