ទីភ្នាក់ងារសារព័ត៌មាន SANA របស់ប្រទេសស៊ីរី បានរាយការណ៍ថា នៅថ្ងៃពុធ (ទី៧ ខែមករា ឆ្នាំ២០២៦) កងទ័ពស៊ីរី បានប្រកាសថា ទីតាំងយោធារបស់ក្រុមភេរវករ PKK/YPG ដែលកំពុងប្រតិបត្តិការក្រោមឈ្មោះ SDF នៅក្នុងតំបន់ Sheikh Maqsoud និង Ashrafieh នៃទីក្រុង Aleppo គឺជា «គោលដៅស្របច្បាប់» បន្ទាប់ពីមានការកើនឡើងនូវភាពតានតឹងរបស់ក្រុមនេះ និង «ការសម្លាប់រង្គាល» នៅក្នុងខេត្ត Aleppo។

ការប្រកាសនេះបានកើតមានឡើងបន្ទាប់ពីក្រុម SDF បានបន្តបាញ់ផ្លោងថ្មីសំដៅលើតំបន់លំនៅឋាន ក្នុងទីក្រុង Aleppo ដែលជាថ្ងៃទី២ នាព្រឹកថ្ងៃពុធនេះ។

មុននេះ សារព័ត៌មាន SANA បានឲ្យដឹងថា ការវាយប្រហារចុងក្រោយនេះ បានផ្តោតលើតំបន់ Al Suryan នៅភាគខាងជើងទីក្រុង Aleppo ខណៈដែលអង្គភាពកងទ័ពស៊ីរី បានប៉ះទង្គិចជាមួយក្រុមភេរវករ នៅតាមសមរភូមិជួរមុខ Castello និង Al Sheihan។

គួរបញ្ជាក់ថា ការបាញ់ផ្លោងនេះ បានធ្វើឡើងបន្ទាប់ពីមានការសម្លាប់មនុស្សយ៉ាងហោចណាស់ ៥នាក់ និងធ្វើឲ្យរបួស ១៦នាក់ អំឡុងការវាយប្រហារជាបន្តបន្ទាប់របស់ភេរវករ SDF នៅទីក្រុង Aleppo កាលពីថ្ងៃអង្គារ។

អាជ្ញាធរប្រតិបត្តិការរបស់កងទ័ពស៊ីរី បានប្រាប់ឲ្យដឹងថា តំបន់ទាំង ២ នឹងត្រូវបានចាត់ទុកជាតំបន់គោលដៅរបស់យោធាស្របច្បាប់ បន្ទាប់ពីម៉ោង ៣រសៀល (ម៉ោងក្នុងស្រុក) (ត្រូវនឹងម៉ោង ១២ ម៉ោងសកល) ដោយអំពាវនាវឲ្យជនស៊ីវិលនៅឲ្យឆ្ងាយពីទីតាំងរបស់ក្រុម SDF និងប្រកាសហាមឃាត់ទាំងស្រុងមិនឲ្យមានការធ្វើដំណើរ នៅក្នុងតំបន់ទាំង២ ត្រឹមពេលនោះ៕