ហេតុការណ៍បាញ់ប្រហារនៅឆ្នេរសមុទ្រ Bondi ស្ថិតក្នុងទីក្រុងស៊ីដនី ដែលខ្មាន់កាំភ្លើង ២នាក់ឪពុក-កូន បំផុសគំនិតដោយរដ្ឋអ៊ិស្លាមមានគោលដៅលើការប្រារព្ធពិធីជនជាតិជ្វីហ្វ បានធ្វើឲ្យជនមូស្លីមឥណ្ឌូនេស៊ីមួយចំនួនរស់នៅក្នុងប្រទេសអូស្រ្តាលី មានការភ័យខ្លាចចំពោះការឈានជើងចេញពីផ្ទះរបស់ពួកគេ ស្របពេលមានសេចក្តីរាយការណ៍កើនឡើងពីឧបទ្ទេវហេតុរើសអើងសាសនាអ៊ិស្លាម ។

សម្រាប់យុវតី Neti គឺជានិស្សិតសិក្សានៅសាកលវិទ្យាល័យរដ្ឋ New South Wales ស្ថិតក្នុងទីក្រុងស៊ីដនី នាងមានការភ័យខ្លាចយ៉ាងខ្លាំង ក្រោយហេតុការណ៍បាញ់ប្រហារកាលពីថ្ងៃទី ១៤ ខែធ្នូ ។

បរិវេណសាលារៀនរបស់នាងស្ថិតនៅតំបន់ជាយក្រុង Kensington មានចម្ងាយត្រឹមតែ ៨គ.មប៉ុណ្នោះពីឆ្នេរសមុទ្រ Bondi ជាទីដែលឪពុក-កូន Sajid និង Naveed Akram បានសម្លាប់មនុស្ស ១៥នាក់ នៅក្នុងការវាយប្រហារមួយមានគោលដៅលើព្រឹត្តការណ៍ Hanukkah ។

លោក Sajid គឺជាជនជាតិឥណ្ឌា ត្រូវបានសម្លាប់ដោយនគរបាល អំឡុងការវាយប្រហារ ខណៈកូនប្រុស Naveed ដែលមានកំណើតនៅអូស្រ្តាលី រងការចោទប្រកាន់បទបំពាន ៥៩ករណី រួមទាំងបទឃាតកម្ម ១៥ករណី និងការប្រព្រឹត្តអំពើភេរវកម្ម ១ករណីផងដែរ ។

ឪពុក-កូនទាំង ២នាក់ បានធ្វើដំណើរទៅកាន់តំបន់ភាគខាងត្បូងហ្វីលីពីននៅប៉ុន្មានសប្តាហ៍មុនការបាញ់ប្រហារ ជាហេតុនាំឲ្យមានការសង្ស័យថា ពួកគេអាចនឹងជាប់ពាក់ព័ន្ធជាមួយក្រុមជ្រុលនិយមនៅក្នុងតំបន់ដែលមានប្រវត្តិបះបោរជាមួយក្រុមជីវពល ប៉ុន្តែនគរបាលអូស្រ្តាលី និយាយថា ពួកគេប្រព្រឹត្តតែខ្លួនឯងប៉ុណ្ណោះ ហើយគ្មានការជាប់ពាក់ព័ន្ធនឹងក្រុមភេរវកម្មនោះទេ ។

អង្គការចុះបញ្ជីរើសអើងសាសនាអ៊ិស្លាមនៅអូស្រ្តាលី ដែលជាអង្គការសហគមន៍តាមដាន និងរាយការណ៍ឧបទ្ទេវហេតុប្រឆំាងមូស្លីមនៅក្នុងប្រទេសនេះ ទទួលបានសេចក្តីរាយការណ៍ចំនួន ១២៦នៃឧបទ្ទេវហេតុស្អប់ខ្ពើមក្នុងសប្តាហ៍ ក្រោយការបាញ់ប្រហារនៅឆ្នេសមុទ្រ Bondi ពោលគឺកើនលើង ១០ដង បើធៀបនឹងកាលពីរយៈពេល ២សប្តាហ៍មុន ៕