ទឹកកខ្វក់នៅទីក្រុងភាគខាងលិច Gandhinagar ប្រទេសឥណ្ឌា នាំឲ្យកើតមានការរីករាលដាលឆ្លងជំងឺគ្រុនពោះវៀន នាំឲ្យមានពលរដ្ឋយ៉ាងច្រើនចូលសម្រាកព្យាបាលនៅក្នុងមន្ទីរពេទ្យកាលពីថ្ងៃអង្គារ រួមទាំងកុមារផងដែរ ។

ក្រុមអាជ្ញាធរ បានចាត់វិធានការភ្លាមៗក្រោយរដ្ឋធានីនៃរដ្ឋ Gujarat មួយនេះ មើលឃើញករណីសង្ស័យចំនួនជាង ១០០នៃជំងឺគ្រុនពោះវៀន ។

ក្រុមមន្រ្តីនិយាយថា ទឹកស្អុយលាយជាមួយប្រភពទឹកផឹក គឺជាមូលហេតុសំខាន់នៃការធ្វើឲ្យទឹកកខ្វក់ និងនាំឲ្យកើតមានការឆ្លងជំងឺគ្រុនពោះវៀនបែបនេះ ។

ជំងឺគ្រុនពោះវៀន ឆ្លងដោយសារកាផឹកទឹកកខ្វក់ ឬបរិភោគអាហារមិនស្អាត ហើយរោគសញ្ញារួមមាន ក្អួតចង្អោរ គ្រុនក្តៅ ឈឺពោះ និងពងបែកលើដើមទ្រូង ។

លោក JN Waghela គឺជាស្នងការក្រុង Gandhinagar និយាយថា មន្ទីរពេទ្យក្រុង Gandhinagar បានអនុញ្ញាតឲ្យអ្នកជំងឺ ១៤នាក់ ចេញពីមន្ទីរពេទ្យ ហើយអ្នកជំងឺនៅសេសសល់ ៨៤នាក់ ស្ថិតក្នុងស្ថានភាពមិនគ្រោះថ្នាក់ដល់អាយុជីវិតនោះទេ ។

លោកបន្តថា ពុំមានស្ថានភាពធ្ងន់ធ្ងររបស់អ្នកជំងឺនោះទេ ហើយអ្នកជំងឺដែលចូលសម្រាកព្យាបាលទាំងអស់នៅថ្ងៃនេះ ទទួលបានការពិនិត្យទាំងស្រុងពីគ្រូពេទ្យ ក៏ដូចជារដ្ឋបាលក្នុងស្រុក ៕