អាជ្ញាធរក្រុមហាម៉ាសបាននិយាយថា ប្រតិបត្តិការស្វែងរកសាកសពចំណាប់ថ្នូរអ៊ីស្រាអែលចុងក្រោយដែលត្រូវបានឃុំខ្លួននៅតំបន់ហ្កាហ្សាបានបន្តឡើងវិញកាលពីថ្ងៃពុធ ទី៧ ខែមករា បន្ទាប់ពីការផ្អាករយៈពេលពីរសប្តាហ៍ដោយសារតែអាកាសធាតុមិនអំណោយផល។ កាលពីពេលមុន អ៊ីស្រាអែល បាននិយាយថាខ្លួន រង់ចាំការប្រគល់សាកសពរបស់ លោក Ran Gvili មុនពេលចាប់ផ្តើមការចរចាលើដំណាក់កាលទីពីរនៃកិច្ចព្រមព្រៀងបទឈប់បាញ់ដ៏ផុយស្រួយជាមួយក្រុមហាម៉ាសដែលបានចូលជាធរមានកាលពីខែតុលា។

អាជ្ញាធរក្រុមហាម៉ាសម្នាក់បាននិយាយថា ស្លាបប្រដាប់អាវុធរបស់ចលនាអ៊ីស្លាមនិយមប៉ាឡេស្ទីនគឺកងពល Ezzedine al-Qassam «អមដោយក្រុមកាកបាទក្រហម កំពុងបន្តឡើងវិញប្រតិបត្តិការស្វែងរកសាកសពចំណាប់ថ្នូរអ៊ីស្រាអែលចុងក្រោយនៅក្នុងសង្កាត់ Zeitun នៅភាគអាគ្នេយ៍ទីក្រុងហ្កាហ្សា»។

អាជ្ញាធរម្នាក់ទៀតបាននិយាយថា ប្រតិបត្តិការស្វែងរកត្រូវបានផ្អាកក្នុងរយៈពេលពីរសប្តាហ៍កន្លងទៅនេះដោយសារតែអាកាសធាតុមានព្យុះនិងភ្លៀងធ្លាក់ខ្លាំង ដែលបានរារាំងដល់ឧបករណ៍ជីកនិងគ្រឿងចក្រផ្សេងទៀតពីការទៅដល់សង្កាត់ Zeitun។

មន្ត្រីរូបនេះបាននិយាយបន្ថែមថា «ប្រតិបត្តិការស្វែងរកបានចាប់ផ្តើមឡើងវិញ ហើយយើងសង្ឃឹមថានឹងរកឃើញសាកសពដើម្បីបិទឯកសារដោះដូរ» ហើយជំរុញសម្ពាធលើអ៊ីស្រាអែលឱ្យបញ្ចប់ដំណាក់កាលដំបូងនៃកិច្ចព្រមព្រៀងបទឈប់បាញ់ និងបើកច្រកព្រំដែនរ៉ាហ្វា រវាងតំបន់ហ្កាហ្សា និងប្រទេសអេហ្ស៊ីប។