ប្រធានាធិបតីអ៊ុយក្រែន លោក Volodymyr Zelenskyy បាននិយាយកាលពីថ្ងៃពុធ (៧ មករា) ថា លោកចង់បានកិច្ចប្រជុំថ្មីមួយផ្សេងទៀត ជាមួយប្រធានាធិបតីអាមេរិក លោក Donald Trump ខណៈក្រុមមន្ត្រីរបស់ភាគីទាំងពីរ បន្តដោះស្រាយបញ្ហាធំៗចំនួនពីរ នោះគឺបញ្ហាទឹកដី និងរោងចក្រនុយក្លេអ៊ែរមួយ ដែលជាប់គាំងខ្លាំងបំផុតនៅក្នុងការចរចាសន្តិភាព ដើម្បីបញ្ចប់សង្គ្រាមរបស់រុស្ស៊ី នៅអ៊ុយក្រែន។

ទីក្រុងគីវ ស្ថិតក្រោមសម្ពាធរបស់សហរដ្ឋអាមេរិក ឱ្យធានាបាននូវកិច្ចព្រមពៀងសន្តិភាពឆាប់រហ័ស ប៉ុន្តែអ៊ុយក្រែន ចង់បានការធានាសន្តិសុខពីសម្ព័ន្ធមិត្ត ហើយកំពុងរុញច្រានបកទៅរុស្ស៊ីវិញ ដែលទាមទារឱ្យអ៊ុយក្រែន ប្រគល់តំបន់ Donetsk ភាគខាងកើតរបស់ខ្លួន និងបោះបង់ចោលការគ្រប់គ្រងរោងចក្រថាមពលនុយក្លេអ៊ែរ Zaporizhzhia។

ថ្លែងប្រាប់អ្នកយកព័ត៌មានកាលពីថ្ងៃពុធ លោក Zelenskyy បាននិយាយថា លោកចង់ជួបជាមួយលោក Trump ម្តងទៀត ក្នុងពេលឆាប់ៗ ដើម្បីវាយតម្លៃពីភាពបើកចំហរបស់លោក ចំពោះសំណើអ៊ុយក្រែន ដែលថា ទីក្រុងវ៉ាស៊ីនតោន ធានាសន្តិសុខទីក្រុងគីវ លើសពី ១៥ឆ្នាំ ក្នុងករណីមានបទឈប់បាញ់។

មេដឹកនាំអ៊ុយក្រែនរូបនេះក៏បានជំរុញលោក Trump ឱ្យបង្កើនសម្ពាធលើរុស្ស៊ី ដែលមិនសូវពេញចិត្តនឹងការជំរុញសន្តិភាពនេះប៉ុន្មានទេ ហើយកំពុងបន្តវាយប្រហារតាមអាកាសដ៏ធំរបស់ខ្លួនលើទីក្រុងនានា និងបណ្តាញថាមពលរបស់អ៊ុយក្រែន។

ការអំពាវនាវរបស់លោក Zelenskyy សម្រាប់ជំនួបថ្មីនេះ កើតឡើងស្របពេលមន្ត្រីអាមេរិក និងអ៊ុយក្រែន បានពិភាក្សានៅទីក្រុងប៉ារីស អំពីបញ្ហាទឹកដី និងជោគវាសនារបស់រោងចក្រនុយក្លេអ៊ែរធំជាងគេរបស់អឺរ៉ុប គឺ Zaporizhzhia ដែលលោកពិពណ៌នាថា ជាបញ្ហាដ៏លំបាកបំផុតទាំងពីរ ក្នុងកិច្ចពិភាក្សា៕