ប្រជាកសិករនៅប្រទេសបារាំង បានបន្តនាំគ្នាចេញធ្វើបាតុកម្ម ដោយបិទផ្លូវនៅទីតាំងជាច្រើនក្នុងទីក្រុងប៉ារីស នៅថ្ងៃព្រហស្បតិ៍ (៨ មករា) នេះ ដើម្បីតវ៉ាប្រឆាំងនឹងកិច្ចព្រមព្រៀងពាណិជ្ជកម្មសេរីដ៏ទូលំទូលាយមួយ ដែលសហភាពអឺរ៉ុប ត្រៀមខ្លួនចុះហត្ថលេខាជាមួយបណ្ដាប្រទេសអាមេរិកខាងត្បូង រួមទាំងការមិនពេញចិត្តផ្សេងទៀត។

កសិករមកពីសហជីពសម្របសម្រួលជនបទ (CR) បានអំពាវនាវឱ្យមានការតវ៉ានៅទីក្រុងប៉ារីស ស្របពេលមានកំហឹងប្រឆាំងនឹងកិច្ចព្រមព្រៀងពាណិជ្ជកម្មសេរី រវាងប្លុកអឺរ៉ុបនិងប្លុកអាមេរិកខាងត្បូង ឬគេស្គាល់ថា Mercosur។ កសិករភ័យខ្លាចថា កិច្ចព្រមព្រៀងទីផ្សាររួមនេះនឹងបង្កឱ្យមានការសម្រុកនាំចូលអាហារតម្លៃថោកទៅបារាំង ដែលនឹងប៉ះពាល់តម្លៃក្នុងស្រុក ហើយក៏មិនពេញចិត្តលើការដោះស្រាយមិនបានល្អរបស់រដ្ឋាភិបាល ក្នុងបញ្ហាជំងឺសត្វពាហនៈក្នុងស្រុក។

ត្រាក់ទ័ររាប់សិបគ្រឿងត្រូវបានចតចោលលើច្រាំងស្ទឹងសែន នៅខាងក្រោមប៉មតួអ៊ីហ្វែល ដោយរារាំងការចូលទៅកាន់កណ្តាលទីក្រុង។ ប្រជាកសិករបាននៅតែអាចនាំយកគ្រឿងចក្ររបស់ពួកគេទៅដល់កណ្តាលទីក្រុងប៉ារីសបាន ទោះបីជានគរបាលបារាំង បានដាក់បម្រាមយ៉ាងតឹងរ៉ឹងក៏ដោយ។

ការតវ៉ានេះបានកើតឡើងត្រឹមតែប៉ុន្មានថ្ងៃប៉ុណ្ណោះ បន្ទាប់ពីគណៈកម្មការអឺរ៉ុប បានស្នើឱ្យផ្តល់មូលនិធិជាមុន ចំនួន ៤៥ពាន់លានអឺរ៉ូ ដល់កសិករ និងយល់ព្រមបន្ថយពន្ធនាំចូលលើជីមួយចំនួន ដើម្បីទាក់ទាញប្រទេសដែលស្ទាក់ស្ទើរក្នុងការគាំទ្រកិច្ចព្រមព្រៀងទីផ្សាររួមអាមេរិកឡាទីនមួយនេះ៕