សមាជិកព្រឹទ្ធសភាគណបក្សសាធារណរដ្ឋដ៏មានឥទ្ធិពលម្នាក់បាននិយាយថា លោកប្រធានាធិបតីសហរដ្ឋអាមេរិក Donald Trump បានគាំទ្រសេចក្តីស្នើច្បាប់ដើម្បីដាក់ទណ្ឌកម្មលើប្រទេសដែលទិញប្រេងរបស់រុស្ស៊ី រួមមានទាំងប្រទេសចិននិងឥណ្ឌា។ លោក Lindsey Graham សមាជិកព្រឹទ្ធសភាមកពីរដ្ឋ សៅ ខារ៉ូឡៃណា(South Carolina) សហរដ្ឋអាមេរិក បាននិយាយកាលពីថ្ងៃពុធថា លោក Trump បាន «បើកភ្លើងខៀវ» សេចក្តីស្នើច្បាប់ទ្វេបក្ស បន្ទាប់ពីកិច្ចប្រជុំ «ប្រកបដោយផ្លែផ្កា»។

ច្បាប់ដាក់ទណ្ឌកម្មលើប្រទេសរុស្ស៊ីរបស់លោក Graham ដែលពង្រៀងជាមួយ លោក Richard Blumenthal សមាជិកគណបក្សប្រជាធិបតេយ្យនឹងផ្តល់អំណាចដល់លោក Trump ដើម្បីដាក់ការដំឡើងពន្ធរហូតដល់៥០០ភាគរយលើការនាំចូលពីប្រទេសនានាដែលធ្វើអាជីវកម្មជាមួយវិស័យថាមពលរបស់រុស្ស៊ី។

លោក Graham បាននិយាយនៅក្នុងសេចក្តីថ្លែងការណ៍ដោយសំដៅទៅលើប្រធានាធិបតីរុស្ស៊ី លោក Vladimir Putin ថា «សេចក្តីស្នើច្បាប់នេះ នឹងអនុញ្ញាតឱ្យលោកប្រធានាធិបតី Trump ដាក់ទណ្ឌកម្មលើប្រទេសទាំងឡាយដែលទិញប្រេងពីរុស្ស៊ីក្នុងតម្លៃទាប ដើម្បីជំរុញក្បាលម៉ាស៊ីនសង្គ្រាមរបស់លោក Putin»។ «សេចក្តីស្នើច្បាប់នេះនឹងផ្តល់ឱ្យលោកប្រធានាធិបតី Trump នូវឥទ្ធិពលយ៉ាងខ្លាំងប្រឆាំងនឹងប្រទេសដូចជាប្រទេសចិន ឥណ្ឌា និងប្រេស៊ីល ដើម្បីជំរុញឲ្យពួកគេឈប់ទិញប្រេងរុស្ស៊ីក្នុងតម្លៃទាប ដែលផ្តល់ហិរញ្ញប្បទានសម្រាប់ការបង្ហូរឈាមរបស់លោក Putin ប្រឆាំងអ៊ុយក្រែន»។

ប្រទេសចិន និងរុស្ស៊ីនៅតែបន្តជាអ្នកទិញប្រេងដ៏សំខាន់របស់រុស្ស៊ី ទោះបីជាមានទណ្ឌកម្មពីសហរដ្ឋអាមេរិក និងអឺរ៉ុបលើវិស័យថាមពលរបស់រុស្ស៊ី ដើម្បីឆ្លើយតបទៅនឹងសង្គ្រាមរបស់ទីក្រុងមូស្គូនៅអ៊ុយក្រែនក៏ដោយ។