ភ្នាក់ងារអន្តោប្រវេសន៍ម្នាក់របស់សហរដ្ឋអាមេរិក បានបាញ់សម្លាប់ស្ត្រីវ័យ ៣៧ ឆ្នាំម្នាក់ ក្នុងទីក្រុង Minneapolis កាលពីថ្ងៃពុធ (៧ មករា) ដែលហេតុការណ៍នេះ បានបង្កឱ្យមានសង្គ្រាមពាក្យសម្ដីយ៉ាងក្ដៅគគុកក្នុងចំណោមក្រុមមន្រ្តី ខណៈអាជ្ញាធរមូលដ្ឋានបានច្រានចោលការលើកឡើងរបស់រដ្ឋបាលលោកប្រធានាធិបតី Donald Trump ដែលអះអាងថា នោះជាការបាញ់ការពារខ្លួន។

ក្រសួងសន្តិសុខមាតុភូមិអាមេរិក បាននិយាយថា ស្ត្រីរូបនោះឈ្មោះ Renee Nicole Good គឺជា «កុបករយ៉ាងហិង្សា» ដែលព្យាយាមបើករថយន្តបំបុកភ្នាក់ងារអនុវត្តច្បាប់អន្តោប្រវេសន៍ និងគយ (ICE)។ ប៉ុន្តែលោក Jacob Frey អភិបាលក្រុង Minneapolis បាននិយាយថា “នេះគឺជាការប្រើអំណាចដោយមិនប្រុងប្រយ័ត្នរបស់ភ្នាក់ងារ ដែលបណ្តាលឱ្យមានអ្នកស្លាប់” និងបានប្រើពាក្យសម្ដីធ្ងន់ៗប្រាប់ក្រុមមន្ត្រី ICE ឱ្យចាកចេញពីទីក្រុងនេះ។

ភ្នាក់ងារ ICE រាប់រយនាក់ ត្រូវបានដាក់ពង្រាយទៅកាន់ទីក្រុងនេះ ជាផ្នែកមួយនៃការបង្ក្រាបទូទាំងប្រទេសរបស់សេតវិមាន លើអន្តោប្រវេសន៍ខុសច្បាប់។ ក្នុងសារបង្ហោះមួយលើបណ្ដាញសង្គម លោក Trump បាននិយាយរិះគន់ខ្លាំងៗទៅលើស្រ្តីរូបនោះ ហើយថា មន្ត្រី ICE ម្នាក់ ត្រូវបានគេបើករថយន្តបំបុក «យ៉ាងព្រៃផ្សៃ»។

រដ្ឋមន្ត្រីសន្តិសុខមាតុភូមិអាមេរិក លោកស្រី Kristi Noem បាននិយាយថា ស្ត្រីរូបនេះបាន «តាមដាន និងរារាំង» មន្ត្រីនគរបាលពេញមួយថ្ងៃ ហើយព្យាយាម «ប្រើយានយន្តរបស់ខ្លួនជាអាវុធ» ក្នុងការប៉ុនប៉ងបើកបំបុកមន្ត្រីនគរបាល ដែលជាទង្វើ «ភេរវកម្មក្នុងស្រុក» ខណៈភ្នាក់ងារសហព័ន្ធបានបាញ់ «ការពារខ្លួន» ក្នុងហេតុការណ៍នោះ៕