អ្នកនាំពាក្យចិនដីគោក កាលពីថ្ងៃពុធ (ទី៧ ខែមករា ឆ្នាំ២០២៦) បានរំលឹកឡើងវិញថា បញ្ហាកោះតៃវ៉ាន់ គឺជាបញ្ហាផ្ទៃក្នុងរបស់ប្រជាជនចិន ហើយមិនអនុញ្ញាតឲ្យមានការជ្រៀតជ្រែកពីខាងក្រៅឡើយ ដោយបានបញ្ជាក់ថា កុំធ្វើការប្រៀបធៀប រវាងកោះតៃវ៉ាន់ និងប្រទេសវ៉េណេស៊ុយអេឡា។

អំឡុងពេលនិយាយនៅឯសន្និសីទសារព័ត៌មាន លោក Chen Binhua អ្នកនាំពាក្យការិយាល័យកិច្ចការកោះតៃវ៉ាន់នៃក្រុមប្រឹក្សារដ្ឋ បានប្រាប់ថា៖ «សហរដ្ឋអាមេរិកបានប្រើកម្លាំងដោយឥតញញើត ប្រឆាំងនឹងប្រទេសដែលមានអធិបតេយ្យភាព ជាទង្វើដែលបំពានច្បាប់អន្តរជាតិយ៉ាងធ្ងន់ធ្ងរ រំលោភលើអធិបតេយ្យភាពរបស់ប្រទេសមួយផ្សេងទៀត ហើយជាការគំរាមកំហែងដល់សន្តិភាព និងសន្តិសុខក្នុងតំបន់។ យើងប្រឆាំងយ៉ាងដាច់អហង្ការ ចំពោះការធ្វើបែបនេះ»។

គួរបញ្ជាក់ថា បន្ទាប់ពីមានការចាប់ខ្លួនប្រធានាធិបតីវ៉េណេស៊ុយអេឡា លោក Nicolas Maduro កាលពីថ្ងៃទី៣ ខែមករា អ្នករិះគន់ជាច្រើន នៅកោះតៃវ៉ាន់ បានប្រៀបធៀប រវាងកោះនេះ និងប្រទេសវ៉េណេស៊ុយអេឡា ដោយបង្កើតបានជាពាក្យចចាមអារ៉ាមថា ចិនដីគោកអាចនឹងចាត់វិធានការស្រដៀងគ្នានេះ។

ជាការឆ្លើយតប លោក Chen បានសង្កត់ធ្ងន់ថា កោះតៃវ៉ាន់ គឺជាដែនដីរបស់ប្រទេសចិន ដោយសង្កត់ធ្ងន់ថា ការដោះស្រាយបញ្ហាតៃវ៉ាន់ គឺជាកិច្ចការផ្ទៃក្នុងរបស់ប្រជាជនចិន ហើយមិនអនុញ្ញាតឲ្យមានការជ្រៀតជ្រែកពីខាងក្រៅនោះឡើយ។

លោកបានបន្ថែមថា៖ «ប្រសិនបើកងកម្លាំងផ្តាច់ខ្លួន គឺឯករាជ្យតៃវ៉ាន់ ហ៊ានធ្វើសកម្មភាពដោយមិនប្រុងប្រយ័ត្ន និងឆ្លងកាត់ខ្សែបន្ទាត់ក្រហម នោះយើងនឹងចាត់វិធានការយ៉ាងម៉ឺងម៉ាត់ និងផ្តល់ផលប៉ះពាល់យ៉ាងធ្ងន់ធ្ងរដោយផ្ទាល់»៕