រដ្ឋមន្ត្រីការបរទេសហុងគ្រី កាលពីថ្ងៃពុធ (ទី៧ ខែមករា ឆ្នាំ២០២៦) បានរិះគន់ផែនការរបស់អឺរ៉ុប ក្នុងការបង្កើតមជ្ឈមណ្ឌលយោធា នៅប្រទេសអ៊ុយក្រែន ដោយបាននិយាយថា ការធ្វើបែបនេះ «រុញអឺរ៉ុបឲ្យទៅកាន់តែកៀក» នឹងការប្រឈមមុខដាក់គ្នាដោយផ្ទាល់ជាមួយរុស្ស៊ី។

លោក Peter Szijjarto បានលើកឡើងតាមរយៈបណ្ដាញសង្គម X ថា៖ «កាលពីម្សិលមិញ (ថ្ងៃអង្គារ) នៅទីក្រុងប៉ារីស សម្ព័ន្ធឆន្ទៈរួមបានធ្វើសំណើមួយផ្សេងទៀត ដែលរុញឲ្យអឺរ៉ុបខិតទៅកាន់តែកៀកនឹងការប្រឈមមុខដាក់គ្នាដោយផ្ទាល់ជាមួយរុស្ស៊ី»។

លោក Szijjarto បានកត់សម្គាល់ថា ប្រទេសហុងគ្រី នឹង «នៅក្រៅគម្រោងនេះ»។ លោកបានបន្ថែមថា៖ «យើងគាំទ្រកិច្ចចរចាសន្តិភាព រួមទាំងការចរចានៅកម្រិតខ្ពស់បំផុត រវាងសហរដ្ឋអាមេរិក និងរុស្ស៊ី ហើយបដិសេធយ៉ាងម៉ឺងម៉ាត់នូវចំណាត់ការចុងក្រោយនេះ ដែលនឹងឆ្ពោះទៅរកការមានសង្រ្គាម»។

គួរបញ្ជាក់ថា នាយករដ្ឋមន្ត្រីចក្រភពអង់គ្លេស លោក Keir Starmer ប្រធានាធិបតីបារាំង លោក Emmanuel Macron និងប្រធានាធិបតីអ៊ុយក្រែន Volodymyr Zelenskyy បានចុះហត្ថលេខាលើសេចក្តីប្រកាសពីចេតនា នៅទីក្រុងប៉ារីស បន្ទាប់ពីបញ្ចប់កិច្ចប្រជុំកំពូល «សម្ព័ន្ធឆន្ទៈរួម» នៅរដ្ឋធានីរបស់ប្រទេសបារាំង។

បន្ទាប់ពីកិច្ចពិភាក្សាជាមួយសម្ព័ន្ធមិត្តរបស់អ៊ុយក្រែន នៅទីក្រុងប៉ារីស ចក្រភពអង់គ្លេស និងបារាំង បានឲ្យដឹងថា ពួកគេនឹង «បង្កើតមជ្ឈមណ្ឌលយោធានៅទូទាំងប្រទេសអ៊ុយក្រែន»៕