រដ្ឋមន្ត្រីការបរទេសអេហ្ស៊ីប លោក Badr Abdelatty បានជួបជាមួយសមភាគីអូម៉ង់របស់លោក គឺលោក Sayyid Badr bin Hamad Al-Busaidi នៅទីក្រុងគែរ កាលពីថ្ងៃពុធ ដើម្បីពិភាក្សាអំពីបញ្ហាក្នុងតំបន់ និងបានអំពាវនាវឲ្យមានដំណោះស្រាយនយោបាយ នៅក្នុងប្រទេសយេម៉ែន និងស៊ូដង់។ នេះបើយោងតាមក្រសួងការបរទេសអេហ្ស៊ីប។

ចំពោះប្រទេសយេម៉ែន រដ្ឋមន្ត្រីនានាបានបញ្ជាក់ជាថ្មីនូវការគាំទ្រចំពោះការសន្ទនានៅទីក្រុងរីយ៉ាដរវាង  ភាគីជម្លោះនៃប្រទេសយេម៉ែន ដើម្បីឈានដល់ដំណោះស្រាយនយោបាយដោយមានការព្រមព្រៀងគ្នាទៅលើបញ្ហាយេម៉ែនភាគខាងត្បូង។ ពួកគេបាននិយាយថា ការចរចានេះ មានគោលបំណងសម្រេចបាន  «ការដោះស្រាយនយោបាយដ៏ទូលំទូលាយ និងប្រកបដោយចីរភាព» ដែលរក្សាអធិបតេយ្យភាព ឯកភាព និងស្ថិរភាពរបស់ប្រទេសយេម៉ែន ដើម្បីបំពេញតាមសេចក្តីប្រាថ្នារបស់ប្រជាជនរបស់ខ្លួន។

កិច្ចប្រជុំនេះ បានកើតឡើង រយៈពេលប៉ុន្មានថ្ងៃបន្ទាប់ពីប្រទេសអារ៉ាប៊ីសាអ៊ូឌីត បានប្រកាសពីផែនការរៀបចំសន្និសីទមួយដែលប្រមូលផ្តុំក្រុមយេម៉ែនភាគខាងត្បូងទាំងមូល បន្ទាប់ពីមានការស្នើសុំពីលោក Rashad Al-Alimi ប្រធានក្រុមប្រឹក្សាភាពជាអ្នកដឹកនាំនៃប្រធានាធិបតីយេម៉ែន។ គំនិតផ្តួចផ្តើមនេះ បានកើតឡើង បន្ទាប់ពីការប៉ះទង្គិចគ្នាឡើងវិញរវាងកងកម្លាំងរដ្ឋាភិបាល និងក្រុមប្រឹក្សាអន្តរកាលភាគខាងត្បូង (STC) នៅក្នុងខេត្ត Hadramout ដោយ STC បានស្នើឲ្យមានរដ្ឋបាលអន្តរកាលសម្រាប់តំបន់ភាគខាងត្បូង និងការធ្វើប្រជាមតិឯករាជ្យដែលអាចកើតមាន។

ទាក់ទងនឹងប្រទេសស៊ូដង់ ជាកន្លែងដែលការប្រយុទ្ធគ្នារវាងកងទ័ព និងកងកម្លាំងគាំទ្ររហ័ស បានបន្តកើតមាន ចាប់តាំងពីខែមេសា ឆ្នាំ២០២៣ រដ្ឋមន្ត្រីទាំងអស់បានសង្កត់ធ្ងន់លើតម្រូវការក្នុងការ          គាំទ្រស្ថាប័នជាតិ បញ្ឈប់អរិភាព ការពារជនស៊ីវិល និងធានាថា ជំនួយមនុស្សធម៌ទៅដល់អ្នកដែលខ្វះខាតតាមរយៈអង្គការសហប្រជាជាតិ និងអង្គការក្នុងស្រុក។ ពួកគេបានសង្កត់ធ្ងន់លើកិច្ចខិតខំប្រឹងប្រែងឆ្ពោះទៅរក «ដំណោះស្រាយនយោបាយដែលមានការព្រមព្រៀងគ្នា» ដែលការពារសិទ្ធិស៊ូដង់ ថែរក្សាអធិបតេយ្យភាព និងលើកកម្ពស់ជំរុញទំនាក់ទំនងសន្តិហវិជ្ជមានជាមួយរដ្ឋជិតខាង៕