ប្រធានាធិបតីអាមេរិក លោក ដូណាល់ ត្រាំ អាចនឹងប្រកាសពីការបង្កើតក្រុមប្រឹក្សាសន្តិភាពហ្កាហ្សា ដែលជាស្ថាប័នមួយ ដើម្បីគ្រប់គ្រងតំបន់ហ្កាហ្សា នៅដើមសប្តាហ៍ក្រោយ។ នេះបើយោងតាមការចុះផ្សាយរបស់គេហទំព័រព័ត៌មាន Axios។

ដោយយោងទៅលើមន្ត្រីអាមេរិកដែលមិនបញ្ចេញឈ្មោះ គេហទំព័រនេះ បានសរសេរថា មេដឹកនាំអាមេរិក   រូបនេះ ត្រូវបានគេរំពឹងថា នឹងធ្វើការប្រកាសនេះ ជាផ្នែកមួយនៃដំណាក់កាលទី ២ នៃកិច្ចព្រមព្រៀងឈប់បាញ់។ ក្រុមប្រឹក្សានេះ នឹងត្រូវបានដឹកនាំដោយលោក ត្រាំ និង «រួមបញ្ចូលមេដឹកនាំពិភពលោកប្រហែល ១៥ រូប»។ វានឹងត្រួតពិនិត្យ «រដ្ឋាភិបាលបច្ចេកទេសប៉ាឡេស្ទីនដែលមិនទាន់ត្រូវបានបង្កើតឡើង» និងត្រួតពិនិត្យ «ដំណើរការកសាងឡើងវិញ» នៅក្នុងតំបន់ហ្កាហ្សា។

គេហទំព័រព័ត៌មាននេះ បានដកស្រង់ប្រភពមួយដែលបានដឹងថា៖«លិខិតអញ្ជើញកំពុងត្រូវបានផ្ញើទៅកាន់ប្រទេសសំខាន់ៗ ឲ្យក្លាយជាសមាជិកនៃក្រុមប្រឹក្សានេះ»។

ក្រុមប្រឹក្សានេះ ត្រូវបានគេរំពឹងថា នឹងរួមបញ្ចូលចក្រភពអង់គ្លេស អាល្លឺម៉ង់ បារាំង អ៊ីតាលី អារ៉ាប៊ីសាអ៊ូ   ឌីត កាតា អេហ្ស៊ីប និងទួរគី។ យោងតាមគេហទំព័រ Axios បានឲ្យដឹងថា អ្នកតំណាងក្រុមប្រឹក្សាសន្តិភាពនៅលើដីនឹងក្លាយជាអតីតប្រេសិតអង្គការសហប្រជាជាតិប្រចាំនៅមជ្ឈិមបូព៌ា Nikolay Mladenov ដែលនឹងទៅបំពេញទស្សនកិច្ចនៅអ៊ីស្រាអែលនៅសប្តាហ៍នេះ ដើម្បីជួបជាមួយលោកនាយករដ្ឋមន្ត្រី បេនចាមីន ណេតាន់យ៉ាហ៊ូ និងមន្ត្រីរដ្ឋាភិបាលអ៊ីស្រាអែលផ្សេងទៀត មុនពេលការប្រកាសដែលបានគ្រោងទុកនោះ។

លោក ត្រាំ បាននិយាយកាលពីខែធ្នូថា សមាសភាពក្រុមប្រឹក្សាសន្តិភាព នឹងត្រូវប្រកាស នៅដើមឆ្នាំ ២០២៦ ដោយបន្ថែមថា វានឹងរួមបញ្ចូលមេដឹកនាំរដ្ឋមួយចំនួន៕