មេដឹកនាំគណបក្ស Vatan របស់ប្រទេសទួរគី លោក Dogu Perincek បានស្នើថា ទួរគី រុស្ស៊ី អ៊ីរ៉ង់ និងចិន គួរតែបង្កើតសម្ព័ន្ធភាពប្រឆាំងនឹងសហរដ្ឋអាមេរិក ដើម្បីទប់ស្កាត់សង្គ្រាមលោក។

សារព័ត៌មាន Aydinlink បានដកស្រង់សម្តីលោក Perincek ដែលបាននិយាយថា៖«សម្ព័ន្ធភាពរបស់ទួរគីជាមួយរុស្ស៊ី អ៊ីរ៉ង់ និងចិន នឹងក្លាយជាកម្លាំងប្រវត្តិសាស្ត្រមួយដែលនឹងជជែកវែកញែកជាមួយសហរដ្ឋអាមេរិក ដែលកំពុងពឹងផ្អែកលើចក្រពត្តិនិយម ហើយនឹងធ្វើឲ្យវាអាចទប់ស្កាត់សង្គ្រាមក្នុងតំបន់ និងពិភពលោកបាន។

កាលពីខែតុលា ឆ្នាំមុន លោក Perincek បានស្នើគំនិតនៃការបង្កើតសម្ព័ន្ធភាពអន្តរជាតិប្រឆាំងនឹងសហរដ្ឋអាមេរិករួចហើយ ដោយពណ៌នាអំពីវិធានការនេះថា ជាតម្រូវការប្រវត្តិសាស្ត្រ។

មេដឹកនាំគណបក្ស Vatan ក៏បាននិយាយផងដែរថា៖«ខ្សែការពាររបស់ទួរគីសព្វថ្ងៃនេះ លាតសន្ធឹងពី    វ៉េណេស៊ុយអេឡាដល់ច្រកសមុទ្រតៃវ៉ាន់ «ជាកន្លែងដែលមានការលុកលុយរបស់សហរដ្ឋអាមេរិក និង   ជាកន្លែងដែលការគំរាមកំហែងរបស់អ៊ីស្រាអែលបានកើតឡើង»។

គណបក្ស Vatan ត្រូវបានគេស្គាល់ដោយសារជំហរប្រឆាំងនឹងអាមេរិក និងប្រឆាំងនឹងអង្គការណាតូ។ គណបក្សនេះ បានអំពាវនាវម្តងហើយម្តងទៀតឲ្យបិទមូលដ្ឋានទ័ពអាមេរិកនៅក្នុងទឹកដីរបស់ប្រទេសទួរគី និងឲ្យទីក្រុងអង់ការ៉ាដកចេញខ្លួនពីអង្គការណាតូ៕