ប្រធានាធិបតីអាមេរិក លោក Donald Trump បាននិយាយថា «មានតែពេលវេលាប៉ុណ្ណោះដែលនឹងបង្ហាញ» ថា តើសហរដ្ឋអាមេរិកនឹងបន្តការត្រួតពិនិត្យលើប្រទេសវ៉េណេស៊ុយអេឡារយៈពេលយូរប៉ុនណា នៅក្នុងបទសម្ភាសន៍មួយដែលត្រូវបានចេញផ្សាយដោយសារព័ត៌មាន New York Times (NYT) នាព្រឹកថ្ងៃព្រហស្បតិ៍ (ទី៨ ខែមករា ឆ្នាំ២០២៦) នេះ។

នៅពេលត្រូវបានសួរដោយសារព័ត៌មាន NYT ថា តើវានឹងមានរយៈពេល ៣ខែ ៦ខែ ១ឆ្នាំ ឬយូរជាងនេះ លោក Trump បានឆ្លើយតបថា៖ «ខ្ញុំនឹងនិយាយថា យូរជាងនេះ»។

លោក Trump បាននិយាយអំពីប្រទេសវ៉េណេស៊ុយអេឡាថា៖ «យើងនឹងកសាងវា (វេណេស៊ុយអេឡា) ឡើងវិញតាមរបៀបដែលផ្ដល់ប្រាក់ចំណេញបានច្រើន»។ លោកបានបន្ថែមថា៖ «យើងនឹងប្រើប្រាស់ប្រេង ហើយយើងនឹងទាញយកធនធានប្រេង។ យើងកំពុងធ្វើឲ្យតម្លៃប្រេងធ្លាក់ចុះ ហើយយើងនឹងផ្តល់ប្រាក់ដល់ប្រទេសវ៉េណេស៊ុយអេឡា ដែលពួកគេត្រូវការយ៉ាងខ្លាំង»។

បើយោងតាមសារព័ត៌មាន NYT បានឲ្យដឹងទៀតថា លោក Trump បានបន្ថែមថា សហរដ្ឋអាមេរិក កំពុង «មានភាពចុះសម្រុងគ្នាយ៉ាងល្អ» ជាមួយរដ្ឋាភិបាលរបស់ប្រធានាធិបតីបណ្ដោះអាសន្ន លោកស្រី Delcy Rodriguez នៅក្នុងប្រទេសវ៉េណេស៊ុយអេឡា នាពេលនេះ។

កាលពីថ្ងៃអង្គារ លោក Trump បានបង្ហាញផែនការ ដើម្បីចម្រាញ់ និងលក់ប្រេងរបស់វ៉េណេស៊ុយអេឡារហូតដល់ ៥០លានបារ៉ែល ដែលជាប់នៅក្នុងប្រទេសវ៉េណេស៊ុយអេឡា ក្រោមការបិទខ្ទប់របស់សហរដ្ឋអាមេរិក ជាសញ្ញាមួយទៀតដែលបង្ហាញថា ទីក្រុងវ៉ាស៊ីនតោនកំពុងសម្របសម្រួលជាមួយរដ្ឋាភិបាលវេណេស៊ុយអេឡា ចាប់តាំងពីមានការចាប់ខ្លួនលោកប្រធានាធិបតី Nicolas Maduro អំឡុងការវាយឆ្មក់កាលពីចុងសប្តាហ៍កន្លងទៅ៕