នៅក្នុងកិច្ចប្រជុំជាមួយរដ្ឋមន្ត្រីក្រសួងមហាផ្ទៃ និងប្រឆាំងគ្រឿងញៀនរបស់ប្រទេសប៉ាគីស្ថាន ក្នុងទីក្រុងប៉េកាំង កាលពីថ្ងៃពុធ (ទី៧ ខែមករា ឆ្នាំ២០២៦) រដ្ឋមន្ត្រីសន្តិសុខសាធារណៈរបស់ចិន លោក Wang Xiaohong បាននិយាយថា ប្រទេសចិនមានឆន្ទៈបង្កើនកិច្ចសហប្រតិបត្តិការ ជាមួយប៉ាគីស្ថាន ដើម្បីប្រយុទ្ធប្រឆាំងនឹងភេរវកម្ម និងឧក្រិដ្ឋកម្មទូរគមនាគមន៍។

តាមរយៈសេចក្តីថ្លែងការណ៍មួយ ដែលចេញផ្សាយដោយក្រសួងរបស់លោក លោក Wang បានបញ្ជាក់ថា កិច្ចខិតខំប្រឹងប្រែង គួរតែត្រូវបានធ្វើឡើង ដើម្បី «ដោះស្រាយហានិភ័យ និងបញ្ហាប្រឈមផ្សេងៗប្រកបដោយប្រសិទ្ធភាព ហើយរួមគ្នាការពារសន្តិសុខជាតិ និងស្ថិរភាពសង្គមរបស់ប្រទេសទាំង២»។

ក្រុមសកម្មប្រយុទ្ធ នៅប៉ាគីស្ថាន បានវាយប្រហារជនជាតិចិនម្តងហើយម្តងទៀត ដែលកំពុងធ្វើការលើគម្រោងហេដ្ឋារចនាសម្ព័ន្ធរាប់ពាន់លានដុល្លារដែលផ្តល់មូលនិធិដោយទីក្រុងប៉េកាំង នៅក្នុងប្រទេសអាស៊ីខាងត្បូង។ ការវាយប្រហារទាំងនេះ បានក្លាយជាប្រភពនៃភាពតានតឹងដ៏ធំ ក្នុងរយៈពេលប៉ុន្មានឆ្នាំចុងក្រោយនេះ។

នៅក្នុងសេចក្តីថ្លែងការណ៍ដាច់ដោយឡែកមួយ នាថ្ងៃព្រហស្បតិ៍នេះ ក្រសួងមហាផ្ទៃប៉ាគីស្ថានបានលើកឡើងថា ភាគីទាំង២ បានព្រមព្រៀងគ្នាបង្កើតក្រុមការងារសន្តិសុខរួមគ្នាប្រចាំត្រីមាស និងធ្វើកិច្ចប្រជុំប្រចាំឆ្នាំ រវាងរដ្ឋមន្ត្រីក្រសួងមហាផ្ទៃ។

លោក Mohsin Naqvi រដ្ឋមន្ត្រីក្រសួងមហាផ្ទៃប៉ាគីស្ថាន បានឲ្យដឹងថា សន្តិសុខរបស់ជនជាតិចិន និងគម្រោងដែលផ្តល់មូលនិធិដោយទីក្រុងប៉េកាំង គឺជាអាទិភាពចម្បង ដោយបានបន្ថែមថា ទីក្រុងអ៊ីស្លាម៉ាបាដ កំពុងបង្កើតអង្គភាពការពារពិសេសមួយ នៅក្នុងរដ្ឋធានី និងស្វាគមន៍ជំនួយរបស់ចិន ដើម្បីដោះស្រាយជាមួយបញ្ហាឧក្រិដ្ឋកម្មតាមប្រព័ន្ធអ៊ីនធឺណិត៕