សភាតំណាងរាស្ត្រសហរដ្ឋអាមេរិក នៅថ្ងៃព្រហស្បតិ៍ (ទី៨ ខែមករា ឆ្នាំ២០២៦) នេះ ត្រូវបានគេរំពឹងថានឹងលុបចោលការវេតូចំនួន ២ ដែលចេញដោយប្រធានាធិបតី លោក Donald Trump ជាការបែកបាក់ដ៏កម្រកើតមាន រវាងប្រធានាធិបតីនៃគណបក្សសាធារណរដ្ឋ និងសម្ព័ន្ធមិត្តរបស់លោក នៅក្នុងសភា។

វាគឺជាបញ្ហាប្រឈមមិនធម្មតាមួយចេញពីសភាគ្រប់គ្រងដោយគណបក្សសាធារណរដ្ឋ ដែលភាគច្រើនបានគាំទ្រលោក Trump អំឡុងឆ្នាំដំបូងរបស់លោកនៅក្នុងតំណែង ខណៈដែលលោកបានលុបចោលការចំណាយរាប់ពាន់លានដុល្លារ ដំឡើងពន្ធ និងចាត់វិធានការ នៅក្នុងវិស័យផ្សេងទៀត ដែលជាធម្មតាត្រូវបានដោះស្រាយនៅវិមាន Capitol Hill។

កាលពីខែមុន លោក Trump បានវេតូគម្រោងទឹកស្អាត ១,៣ពាន់លានដុល្លារ នៅរដ្ឋ Colorado ដោយនិយាយថា សហគមន៍ក្នុងតំបន់ គួរតែផ្តល់មូលនិធិដល់វា និងគម្រោង ១៤លានដុល្លារ នៅក្នុងឧទ្យានជាតិ Everglades ដែលនឹងផ្តល់អត្ថប្រយោជន៍ដល់កុលសម្ព័ន្ធ Miccosukee នៃជនជាតិដើមអាមេរិក ដែលបានប្រយុទ្ធប្រឆាំងនឹងមជ្ឈមណ្ឌលឃុំឃាំងអន្តោប្រវេសន៍ឈ្មោះ «Alligator Alcatraz» ដែលក្រោយមកត្រូវបានបិទ។ គម្រោងទាំង២ ត្រូវបានអនុម័តជាឯកច្ឆន្ទដោយសភា។

ក្រុមបក្សប្រជាធិបតេយ្យ នៅរដ្ឋ Colorado បានចោទប្រកាន់លោក Trump ថា បានប្រើសិទ្ធិវេតូ ដើម្បីដាក់ទណ្ឌកម្មរដ្ឋនេះ ដោយសារមានការចាប់ដាក់ពន្ធនាគារ លោកស្រី Tina Peters ជាអតីតមន្ត្រីបោះឆ្នោតម្នាក់ដែលត្រូវបានរកឃើញថា មានទោសពីបទក្លែងបន្លំម៉ាស៊ីនបោះឆ្នោត នៅក្នុងការបោះឆ្នោតប្រធានាធិបតីឆ្នាំ២០២០។

ដើម្បីបដិសេធការវេតូរបស់លោក Trump ទាំងសភា និងព្រឹទ្ធសភា ត្រូវការសំឡេងភាគច្រើនលើស ២ភាគ៣។ រដ្ឋសភាត្រូវបានគេរំពឹងថា នឹងបំពេញតាមកម្រិតត្រូវការនោះ ខណៈដែលមិនប្រាកដថា តើព្រឹទ្ធសភានឹងធ្វើការបោះឆ្នោតដែរ ឬអត់។ នេះនឹងមិនមែនជាការបែកបាក់គ្នាលើកដំបូងរបស់សភាជាមួយលោក Trump នោះឡើយ។ ព្រឹទ្ធសភាបានបដិសេធការអំពាវនាវរបស់លោក Trump ឲ្យផ្លាស់ប្តូរច្បាប់ដែលផ្តល់អំណាចមានកម្រិតដល់សមាជិកខាងគណបក្សប្រជាធិបតេយ្យ នៅក្នុងសភានោះ៕