មេដឹកនាំប្រឆាំងម្នាក់ នៅកោះ Greenland បានប្រាប់សារព័ត៌មាន Reuters ថា ដែនដីនេះគួរតែធ្វើការចរចាដោយផ្ទាល់ជាមួយរដ្ឋាភិបាលសហរដ្ឋអាមេរិក ដោយគ្មានវត្តមានរបស់ប្រទេសដាណឺម៉ាក ខណៈដែលកោះអាកទិកមួយនេះ កំពុងថ្លឹងថ្លែងពីរបៀបឆ្លើយតបទៅនឹងការជំរុញឡើងវិញរបស់ប្រធានាធិបតី លោក Donald Trump ក្នុងការនាំយកកោះនេះឲ្យស្ថិតនៅក្រោមការគ្រប់គ្រងរបស់សហរដ្ឋអាមេរិក។

លោក Trump ថ្មីៗនេះ បានបង្កើនការគំរាមកំហែងដណ្តើមកាន់កាប់កោះ Greenland ដោយចាប់ផ្ដើមឡើងវិញនូវគំនិតដែលលោកបានលើកឡើងជាលើកដំបូងក្នុងឆ្នាំ២០១៩ ក្នុងអំឡុងពេលកាន់តំណែងអាណត្តិដំបូងរបស់លោក។

កោះ Greenland មានទីតាំងស្ថិតនៅចន្លោះទ្វីបអឺរ៉ុប និងអាមេរិកខាងជើង ដែលធ្វើឲ្យវាក្លាយជាទីតាំងដ៏សំខាន់ សម្រាប់ប្រព័ន្ធការពារមីស៊ីលបាលីស្ទិករបស់សហរដ្ឋអាមេរិក។ ហើយធនធានរ៉ែដ៏សម្បូរបែបរបស់វា ក៏ត្រូវនឹងគោលដៅរបស់ទីក្រុងវ៉ាស៊ីនតោន ដែលចង់កាត់បន្ថយការពឹងផ្អែកលើប្រទេសចិនផងដែរ។ កោះនេះគឺជាដែនដីស្វយ័តរបស់ព្រះរាជាណាចក្រដាណឺម៉ាក។ កោះនេះមានសភា និងរដ្ឋាភិបាលផ្ទាល់ខ្លួន ប៉ុន្តែទីក្រុង Copenhagen នៅតែរក្សាអំណាចលើកិច្ចការបរទេស និងការពារជាតិ។

មេដឹកនាំគណបក្សប្រឆាំងដ៏ធំបំផុត និងជាសំឡេងនយោបាយដ៏លេចធ្លោបំផុត ក្នុងការទាមទារឯករាជ្យឲ្យកោះ Greenland គឺលោក Pele Broberg បាននិយាយថា៖ «យើងជំរុញឲ្យរដ្ឋាភិបាលបច្ចុប្បន្នរបស់យើង មាននូវការសន្ទនាជាមួយរដ្ឋាភិបាលសហរដ្ឋអាមេរិក ដោយគ្មានប្រទេសដាណឺម៉ាក។ ដោយសារការពាក់ព័ន្ធសម្រុះសម្រួលរបស់ដាណឺម៉ាក កំពុងធ្វើឲ្យមានបញ្ហាទាំងដែនដី Greenland និងសហរដ្ឋអាមេរិក»។

លោក Naleraq ដែលគាំទ្រយ៉ាងខ្លាំងក្លា ចំពោះចលនាយ៉ាងរហ័សឆ្ពោះទៅរកការមានឯករាជ្យទាំងស្រុង បានបង្កើនអាសនៈរបស់ខ្លួនទ្វេដងរហូតដល់ ៨កៅអី នៅក្នុងការបោះឆ្នោតកាលពីឆ្នាំមុន ដោយឈ្នះបានសំឡេង ២៥ភាគរយនៃការបោះឆ្នោត នៅលើដែនដីដែលមានប្រជាជនត្រឹមតែ ៥៧.០០០នាក់ប៉ុណ្ណោះ៕