ប្រធានគោលនយោបាយការបរទេសរបស់សហភាពអឺរ៉ុប លោកស្រី Kaja Kallas បាននិយាយកាលពីថ្ងៃព្រហស្បតិ៍៨ មករាសប្ដាហ៍នេះ ថា សហភាពអឺរ៉ុបបានពិភាក្សាអំពីការឆ្លើយតបរបស់អឺរ៉ុបក្នុងករណី ការគំរាមកំហែងរបស់សហរដ្ឋអាមេរិកលើការទិញយកកោះ Greenland ដែលជាទឹកដីពាក់កណ្តាលស្វយ័តរបស់ប្រទេសដាណឺម៉ាក គឺជាការពិត។

លោកស្រី Kallas បានប្រាប់ក្រុមអ្នកសារព័ត៌មាននៅក្នុងសន្និសីទសារព័ត៌មានជាមួយរដ្ឋមន្ត្រីការបរទេសអេហ្ស៊ីប លោក Badr Abdelatty នៅក្នុងរដ្ឋធានីរដ្ឋបាលថ្មីរបស់ប្រទេសអេហ្ស៊ីបថា សារដែលយើងឮទាក់ទងនឹងកោះ Greenland គឺគួរឱ្យព្រួយបារម្ភយ៉ាងខ្លាំង។

អ្នកនាំពាក្យសេតវិមាន លោកស្រី ការ៉ូឡាញ ឡេវីត ( Karoline Leavitt) បាននិយាយកាលពីថ្ងៃពុធ ៧ មករាសប្ដាហ៍នេះថាលោកប្រធានាធិបតី Donald Trump នៅតែប្តេជ្ញាចិត្តចំពោះសម្ព័ន្ធភាព NATO ទោះបីជាលោក និងក្រុមសន្តិសុខជាតិរបស់លោកកំពុងធ្វើការពិភាក្សាយ៉ាងសកម្មអំពីការទិញយកកោះ Greenland របស់សហរដ្ឋអាមេរិកក៏ដោយ។

អ្នកនាំពាក្យរូបនេះបាននិយាយកាលពីថ្ងៃអង្គារថា ប្រធានាធិបតីអាមេរិក លោក Donald Trump និងក្រុមរបស់លោកកំពុងថ្លឹងថ្លែង ជម្រើសជាច្រើន ដើម្បីទិញយកដែនដីហ្គ្រីនលែន របស់ប្រទេសដាណឺម៉ាក រួមទាំងការប្រើប្រាស់យោធាអាមេរិក៕