អាជ្ញាធរបាននិយាយកាលពីថ្ងៃព្រហស្បតិ៍ (៨ មករា) ថា ភ្នាក់ងារអន្តោប្រវេសន៍សហរដ្ឋអាមេរិកម្នាក់ បានបាញ់ប្រហារលើបុរសម្នាក់ និងស្ត្រីម្នាក់ បណ្ដាលឱ្យរបួស នៅទីក្រុង Portland រដ្ឋ Oregon ដែលធ្វើឱ្យមន្ត្រីមូលដ្ឋានអំពាវនាវរកភាពស្ងប់ស្ងាត់ ដោយសារតែកំហឹងរបស់សាធារណជនកំពុងតែក្ដៅគគុក ចំពោះការបាញ់សម្លាប់ស្ត្រីម្នាក់នៅរដ្ឋ Minnesota កាលពីមួយថ្ងៃមុននោះ។

ក្រសួងសន្តិសុខមាតុភូមិអាមេរិក បាននិយាយក្នុងសេចក្តីថ្លែងការណ៍មួយថា ការបាញ់ប្រហារនៅ Portland បានកើតឡើងនៅរសៀលថ្ងៃព្រហស្បតិ៍ ពេលដែលភ្នាក់ងារល្បាតព្រំដែនអាមេរិក កំពុងធ្វើការដើម្បីបញ្ឈប់យានយន្តគោលដៅមួយគ្រឿង។ សេចក្តីថ្លែងការណ៍បន្តថា អ្នកបើកបរ ដែលសង្ស័យថាជាសមាជិកជនអន្ធពាលជនជាតិវ៉េណេស៊ុយអេឡា បានព្យាយាម «ប្រើយានយន្តជាអាវុធ» ដោយបើកបំបុកភ្នាក់ងារទាំងនោះ។ ជាការឆ្លើយតប «ភ្នាក់ងារម្នាក់បានបាញ់ការពារខ្លួន» ហើយអ្នកបើកបរម្នាក់ និងអ្នកដំណើរម្នាក់នៅក្នុងនោះ បានបើកគេចខ្លួន។

នគរបាលក្រុង Portland បាននិយាយថា ការបាញ់ប្រហារកើតឡើងជិតគ្លីនិកមួយកន្លែង នៅភាគខាងកើតក្រុង ហើយបុរសនិងស្ត្រីរងរបួសនោះ ត្រូវបញ្ជូនទៅមន្ទីរពេទ្យ។

ការបាញ់ប្រហារចុងក្រោយនេះ កើតឡើងត្រឹមតែមួយថ្ងៃប៉ុណ្ណោះ បន្ទាប់ពីភ្នាក់ងារសហព័ន្ធម្នាក់ មកពីអង្គភាពអនុវត្តច្បាប់អន្តោប្រវេសន៍ និងគយ (ICE) ដែលជាទីភ្នាក់ងារដាច់ដោយឡែកមួយក្នុងក្រសួងសន្តិសុខមាតុភូមិ បានបាញ់សម្លាប់ស្ត្រីជាម្តាយវ័យ ៣៧ឆ្នាំម្នាក់ ដែលមានកូន ៣នាក់ នៅទីក្រុង Minneapolis ដែលនាំឱ្យមានសង្រ្គាមពាក្យសម្ដីរវាងមន្រ្តី និងការតវ៉ាផ្ទុះឡើងក្នុងចំណោមប្រជាជន៕