អាមេរិក៖ លោកវេជ្ជបណ្ឌិត Anthony Fauci បានព្រមានថា សហរដ្ឋអាមេរិកត្រូវតែចៀសវាងពីការធ្វើឲ្យមានកំហុសដូចអឺរ៉ុប ប្រសិនបើខ្លួនចង់មានឱកាសរៀបចំពិធីអបអរសាទរ ទិវាឯករាជ្យដែលលោកប្រធានាធិបតី Joe Biden បានសន្យាកាលពីសប្ដាហ៍មុន។
លោក Fauci បានប្រាប់ទូរទស្សន៍ CNN កាលពីម្សិលមិញថា វីរុសកូរ៉ូណានៅតែបន្តឆ្លងរាលដាលខ្លាំងពាសពេញសហរដ្ឋអាមេរិក ហើយករណីឆ្លងវីរុសបម្លែងខ្លួនកំពុងបង្កហានិភ័យខ្ពស់។ នៅពេលដែលអ្នកឃើញចំនួនករណីឆ្លងខ្ពស់រហូតដល់ ៦០.០០០នាក់ក្នុងមួយថ្ងៃ នោះគឺជាពេលវេលាងាយរងគ្រោះបំផុតដែលមានការកើនឡើង ហើយវិធានការចាស់ៗត្រូវវិលត្រឡប់មកវិញ។ នោះជាអ្វីដែលបានកើតឡើងយ៉ាងពិតប្រាកដ នៅក្នុងសហភាពអឺរ៉ុប។ សហភាពអឺរ៉ុបកំពុងប្រឹងប្រែងទប់ទល់ នឹងការឆ្លងរាលដាលរលកទី៣ ដែលទំនងជាបណ្ដាលមកពីវីរុសបម្លែងខ្លួនថ្មីងាយនឹងឆ្លង និងសាហាវជាងវីរុសមុន ដែលត្រូវបានគេរកឃើញដំបូងនៅក្នុងចក្រភពអង់គ្លេស។ ក្នុងពេលជាមួយគ្នានេះដែរ ទ្វីបនេះកំពុងដើរយឺតជាងចក្រភពអង់គ្លេស និងសហរដ្ឋអាមេរិកក្នុងអត្រាចាក់វ៉ាក់សាំង។
ស្ថានភាពកាន់តែធ្ងន់ធ្ងរទៅៗ បានធ្វើឲ្យរដ្ឋាភិបាលអឺរ៉ុបមួយចំនួនគ្មានជម្រើស អ្វីក្រៅពីការរឹតបន្តឹងវិធានការរឹតត្បិតជាថ្មីទៀត។ ពាក់កណ្ដាលនៃតំបន់ចំនួន ២០ របស់ប្រទេសអ៊ីតាលី រួមទាំងទីក្រុងរ៉ូម មីលែន និងទីក្រុងវេនីសបានឈានដល់ការបិទជាថ្មីនៅថ្ងៃនេះ ដោយប្រជាជនត្រូវបានហាមឃាត់មិនឲ្យចាកចេញពីផ្ទះរបស់ខ្លួន លើកលែងតែហេតុផលការងារ ឬសុខភាព៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
