រុស្ស៊ី កាលពីថ្ងៃព្រហស្បតិ៍៨ មករាសប្ដាហ៍នេះ បានចោទប្រកាន់សហរដ្ឋអាមេរិកថាបានដុតបញ្ឆេះឲ្យមានភាពតានតឹង និងគំរាមកំហែងដល់ការដឹកជញ្ជូនអន្តរជាតិជាមួយនឹងការរឹបអូសនាវាដឹកប្រេងដែលមានទង់ជាតិរុស្ស៊ីមួយគ្រឿង នៅមហាសមុទ្រអាត្លង់ទិកខាងជើងកាលពីមួយថ្ងៃមុន។

សហរដ្ឋអាមេរិកបាននិយាយថានាវានេះបានដឹកជញ្ជូនប្រេងឲ្យរដ្ឋដូចជាវ៉េណេស៊ុយអេឡា រុស្ស៊ី និងអ៊ីរ៉ង់ ដោយរំលោភលើទណ្ឌកម្មរបស់លោកខាងលិច ហើយបានរឹបអូស បន្ទាប់ពីការវាយឆ្មក់របស់អាមេរិកបានផ្តួលរំលំសម្ព័ន្ធមិត្តរបស់ទីក្រុងមូស្គូ គឺលោក Nicolás Maduro នៅទីក្រុង Caracas។

ក្រសួងការបរទេសទីក្រុងមូស្គូបាននិយាយថា សកម្មភាពនេះនឹងបណ្តាលឱ្យមានភាពតានតឹងផ្នែកយោធា និងនយោបាយបន្ថែមទៀត ដោយបន្ថែមថាខ្លួនមានការព្រួយបារម្ភអំពី ឆន្ទៈរបស់ទីក្រុងវ៉ាស៊ីនតោនក្នុងការបង្កើតស្ថានភាពវិបត្តិអន្តរជាតិកាន់តែធ្ងន់ធ្ងរ។

ការរឹបអូសរបស់សហរដ្ឋអាមេរិក បានកើតឡើង ខណៈទីក្រុងវ៉ាស៊ីនតោនមានការខកចិត្តចំពោះទីក្រុងមូស្គូ ជុំវិញវឌ្ឍនភាពតិចតួចលើការជំរុញការទូតរបស់ខ្លួនដើម្បីបញ្ចប់សង្គ្រាមនៅអ៊ុយក្រែន។

សហរដ្ឋអាមេរិក បានរឹបអូសនាវានេះប៉ុន្មានថ្ងៃបន្ទាប់ពីប្រធានាធិបតីសហរដ្ឋអាមេរិកលោក Donald Trump បាននិយាយថារូបលោក មិនសប្បាយចិត្ត ជាមួយសមភាគីរុស្ស៊ីរបស់លោកគឺលោក Vladimir Putin នោះទេ។

ទីក្រុងមូស្គូ និយាយថា នាវានោះកំពុងធ្វើដំណើរស្របតាមច្បាប់អន្តរជាតិ និងក្រោមការអនុញ្ញាតបណ្ដោះអាសន្នរបស់ច្បាប់រុស្ស៊ី ក្នុងការដឹកជញ្ជូនក្រោមទង់ជាតិរដ្ឋនៃ សហព័ន្ធរុស្ស៊ី៕