អ៊ីស្រាអែល បាននិយាយកាលពីថ្ងៃព្រហស្បតិ៍ថា ខ្លួនបានហាមបុគ្គលិកពេទ្យនិងមនុស្សធម៌បរទេស មកពីអង្គការដែលមិនបានចុះឈ្មោះបុគ្គលិករបស់ពួកគេជាមួយអាជ្ញាធរអ៊ីស្រាអែល មិនឱ្យចូលទៅក្នុងតំបន់ហ្កាហ្សា។

អ៊ីស្រាអែល បានបញ្ជាឱ្យអង្គការមិនមែនរដ្ឋាភិបាលអន្តរជាតិចំនួន៣៧អង្គការ ឲ្យបញ្ឈប់ការងារ ទោះបីជាមានតម្រូវការមនុស្សធម៌នៅក្នុងតំបន់ហ៊ុមព័ទ្ធដែលរងការបំផ្លាញដោយសង្គ្រាមក៏ដោយ។ ក្រុមជំនួយចំនួនបីបាននិយាយថា បុគ្គលិកបរទេសរបស់ខ្លួនត្រូវបានអាជ្ញាធរអ៊ីស្រាអែលប្រាប់នៅសប្តាហ៍នេះថា ពួកគេមិនអាចចូលទៅក្នុងតំបន់ហ្កាហ្សាបានទេ។

ក្រសួងអន្តោប្រវេសន៍របស់អ៊ីស្រាអែល ដែលគ្រប់គ្រងដំណើរការចុះឈ្មោះ និយាយថា វិធានការទាំងនេះមានន័យថា ដើម្បីការពារការបង្វែរជំនួយដោយក្រុមប្រដាប់អាវុធប៉ាឡេស្ទីន ហើយនឹងមិនប៉ះពាល់ដល់ «ប្រហែល ៩៩%» នៃ «ជំនួយមនុស្សធម៌សរុប»។ ប្រភពជំនួយចំនួនពីរបាននិយាយថា ក្រុមមួយចំនួនកំពុងថ្លឹងថ្លែងថាតើត្រូវចុះឈ្មោះបុគ្គលិកទៅឲ្យអាជ្ញាធរអ៊ីស្រាអែលឬយ៉ាងណា។

ប៉ុន្តែអង្គការមិនមែនរដ្ឋាភិបាលនិយាយថា ការចែករំលែកព័ត៌មានលម្អិតរបស់បុគ្គលិក បង្កហានិភ័យ ដោយអះអាងបុគ្គលិកជំនួយរាប់រយនាក់ត្រូវបានសម្លាប់ ឬរងរបួសក្នុងអំឡុងសង្គ្រាមនៅតំបន់ហ្កាហ្សារយៈពេលពីរឆ្នាំមកនេះ។

រដ្ឋាភិបាលអ៊ីស្រាអែលបាននិយាយថា ក្រុមជំនួយប្រហែល២៣ក្រុមបានព្រមព្រៀងចំពោះច្បាប់ចុះឈ្មោះថ្មី មានន័យថាជំនួយមនុស្សធម៌នឹងបន្តចូលទៅក្នុងតំបន់ហ្កាហ្សា។ អ៊ីស្រាអែលបានចោទប្រកាន់ក្រុមហាម៉ាស និងក្រុមប្រដាប់អាវុធផ្សេងទៀតថាបានលួចជំនួយដែលមានគោលដៅសម្រាប់ប្រជាជនប៉ាឡេស្ទីននៅក្នុងតំបន់ហ្កាហ្សា។