ប្រធានាធិបតីសហរដ្ឋអាមេរិក លោក Donald Trump បានបង្ហើបឱ្យដឹងកាលពីថ្ងៃព្រហស្បតិ៍ (៨ មករា) ថា មេដឹកនាំគណបក្សប្រឆាំងដ៏សំខាន់របស់វ៉េណេស៊ុយអេឡា គឺលោកស្រី Maria Corina Machado នឹងទៅកាន់ទីក្រុងវ៉ាស៊ីនតោន នៅសប្តាហ៍ក្រោយនេះ។

ក្នុងបទសម្ភាសន៍របស់ទូរទស្សន៍ Fox News លោក Trump ត្រូវបានគេសាកសួរថា តើលោកមានគម្រោងជួបលោកស្រី Machado ដែរឬទេ បន្ទាប់ពីការវាយប្រហាររបស់អាមេរិក លើវ៉េណេស៊ុយអេឡា ដែលឈានទៅដល់ការចាប់ខ្លួនមេដឹកនាំប្រទេសនេះ គឺលោក Nicolas Maduro។ លោក Trump បានឆ្លើយតបថា «លោកយល់ថា លោកស្រី Machado នឹងមក (សហរដ្ឋអាមេរិក) នៅសប្តាហ៍ក្រោយក្នុងវេលាណាមួយ ហើយលោកទន្ទឹងរង់ចាំនិយាយសួរសុខទុក្ខទៅកាន់លោកស្រី»។

សេតវិមានមិនទាន់អត្ថាធិប្បាយលើកិច្ចប្រជុំនេះទេ។ ប្រសិនបើកើតឡើងមែន នេះនឹងក្លាយជាជំនួបលើកដំបូងបំផុតរបស់លោក Trump ជាមួយលោកស្រី Machado ដែលបាននិយាយកាលពីដើមសប្តាហ៍នេះថា លោកស្រីមិនបានជជែកជាមួយមេដឹកនាំអាមេរិកសោះ ចាប់តាំងពីលោកស្រីឈ្នះរង្វាន់ណូបែលសន្តិភាព ក្នុងខែតុលា មក។

អភិបាលកិច្ចពេលអនាគតរបស់ប្រទេសអាមេរិកខាងត្បូងមួយនេះ នៅតែស្ថិតក្នុងភាពមិនច្បាស់លាស់។ កាលពីចុងសប្តាហ៍មុន លោក Trump បានច្រានចោលគំនិតនៃការធ្វើការជាមួយលោកស្រី Machado ដោយនិយាយថា "លោកស្រីពុំមានការគាំទ្រ ឬការគោរពនៅវ៉េណេស៊ុយអេឡានោះទេ"៕