ប្រធានាធិបតីអ៊ុយក្រែន លោក Volodymyr Zelenskiy បាននិយាយកាលពីថ្ងៃព្រហស្បតិ៍ (៨ មករា) ថា សេចក្ដីព្រាងនៃការធានាសន្តិសុខទ្វេភាគី រវាងទីក្រុងគីវ និងទីក្រុងវ៉ាស៊ីនតោន គឺ «រួចរាល់ជាស្រេចហើយ» ហើយនឹងយកទៅសម្រេចចុងក្រោយជាមួយលោកប្រធានាធិបតីសហរដ្ឋអាមេរិក Donald Trump ដោយស្វះស្វែងរកជំនួបកំពូលថ្មីមួយទៀតដើម្បីដោះស្រាយបញ្ហាជាប់គាំងសំខាន់ៗ។

ដើម្បីទុកជាមូលដ្ឋានគ្រឹះនៃដំណោះស្រាយក្រោយសង្គ្រាម អ៊ុយក្រែនបានស្វះស្វែងរកការធានាសន្តិសុខយ៉ាងរឹងមាំ ដែលជាការប្ដេជ្ញាចិត្តពីសហរដ្ឋអាមេរិក និងសម្ព័ន្ធមិត្តលោកខាងលិចផ្សេងទៀត ក្នុងការជួយអ៊ុយក្រែន ប្រសិនបើរុស្ស៊ី បើកប្រតិបត្តិការយោធាម្តងទៀត។

ប្រេសិតមកពីអ៊ុយក្រែន និងអាមេរិក ដែលចូលរួមដោយសម្ព័ន្ធមិត្តអ៊ុយក្រែនផងដែរនោះ បានជួបចរចានៅទីក្រុងប៉ារីស នាសប្តាហ៍នេះ ដើម្បីដោះស្រាយការខ្វែងគំនិតដែលនៅសេសសល់ ក្នុងក្របខណ្ឌសន្តិភាព ដែលអាមេរិក កំពុងដោះស្រាយជាមួយទីក្រុងគីវ មុនពេលដាក់ជូនភាគីរុស្ស៊ី។ កាលពីថ្ងៃអង្គារ អាមេរិកបានគាំទ្រយ៉ាងកម្រលើគំនិតនៃការធានាសន្តិសុខសម្រាប់អ៊ុយក្រែន ជាលើកដំបូងបំផុត។

ក្នុងការបង្ហោះមួយលើបណ្ដាញសង្គម X លោក Zelenskiy បាននិយាយថា ឯកសារទ្វេភាគីស្តីពីការធានាសន្តិសុខសម្រាប់អ៊ុយក្រែន ឥឡូវនេះបានត្រៀមរួចរាល់ហើយ សម្រាប់ការសម្រេចចុងក្រោយនៅកម្រិតថ្នាក់ដឹកនាំជាមួយលោកប្រធានាធិបតី Trump។

លោក Zelenskiy និយាយថា ក្របខណ្ឌសន្តិភាពត្រូវបានព្រមព្រៀងគ្នា ៩០% រួចហើយក៏ពិតមែន ក៏ប៉ុន្តែបញ្ហាស្មុគស្មាញនៅតែមាន ជុំវិញថា អ្នកណាជាអ្នកគ្រប់គ្រងរោងចក្រនុយក្លេអ៊ែរ Zaporizhzhia ក៏ដូចជាការទាមទារផ្សេងទៀតរបស់រុស្ស៊ី ឱ្យទីក្រុងគីវប្រគល់ទឹកដីដ៏សំខាន់មួយនៅភាគខាងកើតអ៊ុយក្រែន ដែលទីក្រុងមូស្គូ មិនទាន់អាចដណ្តើមយកបាន ក្នុងសង្គ្រាមជិត ៤ឆ្នាំមកនេះ៕