បណ្ដានាយកប្រតិបត្តិក្រុមហ៊ុន ឈ្មួញកណ្តាលពន្ធ និងមេធាវីពាណិជ្ជកម្មទូទាំងពិភពលោក កំពុងរង់ចាំមើលសេចក្តីសម្រេចរបស់តុលាការកំពូលសហរដ្ឋអាមេរិក លើភាពស្របច្បាប់នៃពន្ធសកលដ៏ទូលំទូលាយរបស់លោកប្រធានាធិបតី Donald Trump និងការតស៊ូផ្លូវច្បាប់ដែលអាចកើតមាន លើការទទួលបានប្រាក់សងត្រឡប់មកវិញប្រហែល ១៥០ពាន់លានដុល្លារ ពីរដ្ឋាភិបាលទីក្រុងវ៉ាស៊ីនតោន សម្រាប់ពន្ធដែលបានបង់រួចហើយដោយអ្នកនាំចូល ប្រសិនបើរដ្ឋបាលលោកចាញ់ក្ដី។

ការរំពឹងទុកថា តុលាការនឹងលុបចោលពន្ធគយដែលលោក Trump បានដាក់ នៅក្រោមច្បាប់អំណាចសេដ្ឋកិច្ចបន្ទាន់អន្តរជាតិឆ្នាំ១៩៧៧ បានកើនឡើងកាន់តែខ្លាំង បន្ទាប់ពីការជជែកវែកញែកកាលពីខែវិច្ឆិកា ក្នុងករណីនេះ ដោយនៅពេលនោះ ចៅក្រមអភិរក្សនិយម និងសេរីនិយម បានសម្តែងការសង្ស័យថា តើច្បាប់នោះផ្តល់សិទ្ធិអំណាចឱ្យលោក Trump ក្នុងការដំឡើងពន្ធធ្ងន់ៗបែបនេះដែរឬទេ។

តុលាការត្រូវបានគេរំពឹងថា នឹងចេញសេចក្តីសម្រេចនៅថ្ងៃសុក្រ ទី៩ ខែមករា នេះ (ពេលវេលានៅសហរដ្ឋអាមេរិក) ប៉ុន្តែដូចទម្លាប់កន្លងមក តុលាការកំពូលមិនបាននិយាយថា សំណុំរឿងអ្វីដែលនឹងត្រូវចេញសាលក្រមនោះទេ។ ក្រុមហ៊ុនមួយចំនួនរំពឹងថា ទោះបីជាតុលាការលុបចោលពន្ធរបស់លោក Trump ក៏ដោយ ក៏ប្រធានាធិបតីមកពីបក្សសាធារណរដ្ឋរូបនេះនឹងមិនឱ្យពួកគេទទួលបានប្រាក់សំណងទៅវិញងាយៗនោះដែរ។

ទិន្នន័យបង្ហាញថា ពន្ធទាក់ទងនឹងច្បាប់អំណាចសេដ្ឋកិច្ចបន្ទាន់អន្តរជាតិ ឬ IEEPA របស់លោក Trump បានបង្កើតប្រាក់ចំណូលប្រមាណ ១៣៣,៥ ពាន់លានដុល្លារ ពីការប្រមូលពន្ធ ចន្លោះថ្ងៃទី៤ ខែកុម្ភៈ ឆ្នាំ២០២៥ ដល់ថ្ងៃទី ១៤ ខែធ្នូ ឆ្នាំ២០២៥ ដែលជាកាលបរិច្ឆេទទិន្នន័យថ្មីបំផុតពីទីភ្នាក់ងារគយ និងការពារព្រំដែនអាមេរិក (CBP)។ យោងតាមការគណនាដោយសារព័ត៌មានរ៉យទ័រ បានបង្ហាញថា ចំនួនសរុបបច្ចុប្បន្ន ត្រូវប៉ាន់ប្រមាណថា នឹងខិតជិត ១៥០ពាន់លានដុល្លារ ដោយផ្អែកលើការបន្តប្រមូលពន្ធប្រចាំថ្ងៃជាមធ្យម ចាប់ពីចុងខែកញ្ញា ដល់ពាក់កណ្តាលខែធ្នូ កន្លងទៅ៕